Sab’ai sayyor dagi Navoiyning tush ko‘rib, tushida Shoh Bahrom unga minnatdorlik bildirgan 37-bobdan

Sab’ai sayyor”dagi Navoiyning tush ko‘rib, tushida Shoh Bahrom unga minnatdorlik bildirgan 37-bobdan:

Yana bukim alar qilurda raqam,

Forsiyni magarki erdi qalam

Ki, nekim kilk savti soldi sado

Forsiy lafz birla topti ado.

Forsiy bilgan ayladi idrok,

Lek mahrum qoldilar atrok.

Sen chu nazmingni turktoz etting,

Forsiy tildin ehtiroz etting.

Holiyo chun zamonda sultonlar,

Ko‘pragi keldi taxmisaxonlar.

Dahr aro shah chu turk voqe’dur

El aro turk lafzi shoyi’dur.

Chun bu ma’nini aylading malhuz,

Turk ulus dog‘i bo‘ldilar mahzuz.

Nasriy bayon:

Ularning (ya’ni oldingi xamsanavislarning) forsiy qalamlari forsiy nayidan bo‘lib, undan chiqqan savti-sado ham forsiy lafzida edi. Binobarin ularni forsiycha bilgan kishilargina o‘qib, ko‘p turkiy xalqlar undan bebahra qolgan edilar. Sen o‘z nazmingni turkiy tilda yozding, forsiyda yozishdan or qilding. Hozirgi zamon sultonlarining ko‘pchiligi xamsaxon bo‘lib, undagi dostonlarni mutolaa qilib turadilar. Dunyodagi shohlar ichida kim turk bo‘lsa, u yerning xalqi ham turkiy tilda gaplashadilar. Sen shu holatni hisobga olganing tufayli, turk ulusini ham g‘oyatda xursand va rozi qilding.