Reje: Kirisiw

Jámaat kelisimi tárepleri, dúzilis tártibi hám mazmunı.
Reje:

1. Kirisiw

2. Tiykarǵı bólim
a) Jámaat kelisimleriniń túrleri
b) Jámaat kelisimleriniń mazmunı
3. Juwmaqlaw

Kirisiw
Xizmetkerler hám jumıs beriwshiler ortasındaǵı sociallıq sheriklik kárxananı birgelikte basqarıw, onıń rawajlanıwı hám nátiyjeliligin joqarılatıw, islep shıǵarıw imkaniyatların asırıwǵa qaratılǵan. Islep shıǵarıwdaǵı sociallıq sheriklik nátiyjelerinen xizmetkerler de, jumıs beriwshi de mápdar bolıwı sheriklik baylanısların dawam ettiriwdiń háreketlendiriwshi kúshi sanaladı.
Jámaat shártnaması hám jámaat kelisimi xizmetkerler hám jumıs beriwshiler ortasındaǵı jámiyetlik birge islesiw hám sherikliktiń tiykarǵı forması esaplanadı. Sebebi bul lokal hújjetlerde kárxana islep shıǵarıw turmısı da, sociallıq sheriklik te tolıq óz kórinisin tabadı.
Jámaat pitimleriniń joqarı dárejede hám keń kólemde ámelge asırılatuǵın forması jámaat kelisimleri esaplanadı. Olar tarmaq, aymaq hám ekonomikanıń barlıq tarmaqları dárejesindegi normativlik lokal hújjet sanaladı.Miynet kodeksiniń 29-statyasına kóre belgili bir kásip, tarmaq , aymaq xizmetkerleri ushın miynet shártleri, jumıs penen támiyinlew hám sociallıq kepillikler belgilew barısındaǵı minnetlemelerdi óz ishine alıwshı normatıv hújjet sanaladı.
Jámaat kelisiminiń jámaat shártnamasınan parqı bir kárxana kóleminde emes, bálkim úlken kólemde yaǵnıy belgili bir aymaq yaki tarmaqta ámel qıladı hám óz áhmiyetine kóre áhmiyetli bolǵan sociallılq sheriklik múnasibetlerin úlken aymaqta bir neshe júzlep, hátte mıńlap kárxana sheńberinde tártipke saladı. Jámaat kelisimi kárxananıń múlikshilik forması, is júritiw usılınan qatıy názer miynet shárayatların belgilewshi yuridik hújjet sanaladı.
Jámaat kelisimi óz mazmunına kóre nızam talaplarına tiykarlanǵan bolıwı lazım hám onda xizmetkerler ahwalın miynet nızam hújjetlerinde názerde tutılǵanınan jamanlastırıwshı normalar belgileniwi múmkin emes, sebebi Miynet kodeksiniń 5-statyasına kóre miynet haqqındaǵı kelisimler hám shártnamalardıń xizmetkerler ahwalın miynet haqqındaǵı nızamlar hám basqa normatıv hújjetlerde názerde tutılǵanına qaraǵanda jamanlastıratuǵın shártler hqıyqıy emes dep tabılıwı belgilengen.
Jámaat kelisiminde eki tárep: jumıs beriwshi hám xizmetkerler wákillik organları ortasında dúziliwi belgilengen. Usıǵan kóre, kárxanalardıń kárxana jaylasqan aymaqtan basqa aymaqta iskerlik júritiwshi filialları hám basqa quramlıq bólimleri jumıs beriwshi tárepinen berilgen wákillik tiykarında jámaat shártnamasın dúziwi múmkin.
Jumıs beriwshi menen jámaat shártnamasın dúziw zárúrligi haqqında qarar qabıl qılıw huqıqı kásiplik birlespesine, xizmetkerler tárepinen wákillik berilgen basqa wákillik organı yaki tikkeley miynet jámaatiniń ulıwma jıynalısı(konferensiya)na berilgen.
Miynet kodeksiniń 31-statyasına kóre hár bir tórep jámaat shártnaması, kelisimin dúziw hám ózgertiw boyınsha sóylesiwler alıp barıw usınısı menen shıǵıw huqıqına haqlı.
Kásiplik birlespesi, xizmetkerlerdiń basqa wákillik organları ózleri wákil qılǵan xizmetkerler atınan sóylesiwler alıp barıw, jámaat kelisimine qosımshalar kiritiw huqıqına iye.
Jámaat kelisimin dúziw, ózgertiw hám toltırıw ushın jumıs beriwshi, jumıs beriwshiler birlespesi menen kásiplik birlespesi yaki xizmetlerdiń basqa wákillik organları ortasında sóylesiwler alıp barıladı. Zárúr jaǵdaylarda sóylesiwlerde atqarıwshı hákimiyat organları da qatnasadı. Jumıs beriwshiler, atqarıwshı hákimiyat organları kásiplik birlespesi, xizmetkerlerdiń basqa wákillik organları kórip shıǵıw ushın usınıs etken miynetke tiyisli máseleler boyınsha sóylesiwler alıp barıwǵa májbúr.
Nızamǵa muwapıq tiyisli jazba xabar alǵan tárep jeti kúnlik múddet ishinde sóylesiwlerge kirisiwi shárt. Aldıńǵı jámaat kelisimi múddeti tamamlanıwına shekem úsh ay dawamında hár bir tárep basqa tárepke jańa jámaat kelisimin dúziw boyınsha sóylesiwler baslaw boyınsha jazba xabar beriwge haqlı.