Reja: Stansiyalar Razyezdlar va o`zib o`tish punktlari

Razyezdlar faqat bir yo’lli liniyalarda qurilib, qarama-qarshi yo’nalish poyezdlarini o’zaro o’tkazib yuborish (kesishuv) va bir yo’nalishdagi poyezdlarni o’zaro quvib o’tishi uchun xizmat qiladi. Razyezdlar bosh yo’l va bir-ikki qabul-jo’natish yo’llaridan iborat bo’ladi qarama-qarshi yo’nalish poyezdlarini o’zaro o’tkazib yuborish uchun birinchi kelayotgan poyezd qabul-jo’natish yo’llarining biriga (asosan o’ng tomon yo’liga) qabul qilib to’xtatiladi, qarama-qarshi tomondan kelayotgan ikkinchi poyezd bosh yo’l bo’ylab to’xtatmay o’tkazib yuboriladi. Ikkinchi poyezd kirish strelkali bo’g’izidan o’tgan zahoti to’xtatilgan birinchi poyezd uchun yo’l hozirlanib, chiqish signali ochiladi va poyezd jo’natiladi. Poyezdlarning o’zaro quvib o’tishi birinchi kelayotgan poyezdni qabul-jo’natish yo’liga olib to’xtatish va shu yo’nalishda kelayotgan ikkinchi tezkor poyezdni to’xtatmay o’tkazib yuborishdan iborat. Agar quvib o’tuvchi yo’lovchi poyezdi bo’lib, uning to’xtashi va yo’lovchilar o’tkazishi ko’zda tutilgan bo’lsa, u holda qulaylik va xavfsizlik maqsadlarida birinchi poyezdni yo’lovchi binosining qarama-qarshi tomonidagi yo’lga olib to’xtatish lozim bo’ladi. Razyezdlarda kesishuv va quvib o’tishdan tashqari ayrim yo’lovchi va shaharatrof poyezdlariga yo’lovchilar chiqarish-tushirish, ayrim hollarda kam miqdorda yuk ishlarini bajarish mumkin. O’zbekistondagi razyezdlarning aksariyat qismi aholi gavjum va qishloq xo’jaligi rivojlangan hududlardan o’tgani sababli ko’pchilik razyezdlarda yo’lovchi va yuk ishlari bajariladi. Razyezdlarning chizmalari qabul-jo’natish yo’llarining o’zaro joylashuviga qarab bo’ylama, yarimbo’ylama va ko’ndalang turlarga bo’linadi.