Reja: Jahon axborot resurslari

7-mavzu: Jahon axborot resurslari va ochiq foydalanish manbalari. Xalqaro nashrlar uchun ilmiy maqolalar tayyorlash, nashr etish https://www.mendeley.com/

REJA:

• Jahon axborot resurslari
• Ochiq foydalanish manbalari
• Xalqaro nashrlar uchun ilmiy maqolalar tayyorlash va nashr etish

Mavzuning maqsadi.: Jahon axborot resurslari va ochiq foydalanish manbalari va xalqaro nashrlar uchun ilmiy maqolalar tayyorlash hamda nashr etish haqida tushunchalar berish.
Jahon axborot resurslari (JAR) tushunchasi mohiyatini anglash uchun mavjud qonun va standartlar asosida asosiy tushunchalar mazmuniga aniqlik kiritish darkor.
«Axborot resurslari», «axborot-kutubxona resurslari», «axborot ilmiy-ta’limiy resurslar» kabi tushunchalarni farqlash lozim.
Axborot resurslari - matn ko‘rinishidagi materiallar, ovozli yozuvlar va tasvirlardir. Bu umumiy tushuncha bo‘lib, resurs axborotdan yaratiladi, lekin uning aniq bir shaklini anglatmaydi.
Axborot-kutubxona resursi - moddiy ob’ektda matn, ovozli yozuv yoki tasvir tarzida qayd etilgan hamda identifikatsiyalash, saqlash va foydalanishni ta’minlash uchun rekvizitlarga ega bo‘lgan axborot. Bu yerda «identifikatsiyalash uchun rekvizitlar» tushunchasi muhim o‘rin tutadi, chunki, mazkur ko‘rsatkichlar asosida hujjatni topish (identifikatsiyalash) mumkin.
Rekvizitlar qat’iy qoidalar va kutubxonachilik standartlari asosida qo‘yiladi. Bu an’anaviy hamda elektron, virtual kutubxonalardagi ma’lumotlar qidiruv jarayonini shakllantirishda muhim jihatdir.
Ilmiy-ta’limiy axborot resurslari – litsenziyalangan va taqrizdan o‘tgan ilmiy-ta’limiy axborotlar (jurnallar, maqola, kitoblar, multimedia va boshqalar). Ilmiy-ta’limiy axborot resurslari muhim qiymatga ega bo‘lgan intellektual manbadir. Odatda har bir hujjat ma’lumotlar bazasi, jurnallar, tegishli to‘plamlarga kiritilishidan avval yetakchi olimlar, mutaxassislar tomonidan saralashdan o‘tadi. Bu hujjatlar tizimlashtiriladi, kataloglashtiriladi va operativ foydalanishni ta’minlash maqsadida ilmiy-ta’limiy axborotlarning ma’lumot bazalariga joylashtiriladi. Asosiy foydalanuvchilarini ilmiy xodimlar, o‘qituvchilar, magistrlar va talabalar tashkil etadi.
Jahon axborot resurslari – dunyoning yetakchi nashriyotlarining axborot resurslaridir. Bu axborot qidiruv tizimiga ega jamiyat tomonidan tan olingan tizimlashtirilgan va tuzilmalashgan ilmiy-ta’limiy resurslarning ma’lumot bazalaridir.
Yuqori impakt faktorli jurnallar, eng ko‘p iqtibos keltirilgan ilmiy monografiyalar, darsliklar, maqolalar va boshqa resurslar kiradi.