Qurilish materiallari

Yelimlash usulida termoplastik va termoreaktiv plastmassa qismlardan yig'ilib, buyum hamda konstruksiyalar olinadi. Plastmas­salarni yelimlashda turli xil yelimlar issiq va sovuq holda ishlatiladi. Termoplastik polimerlar ulanish joyi organik erituvchilar yordamida ishlov berilib, biroz shishirish hisobiga yaxlitlanadi. Plastmassa xiliga qarab aynan shu polimer asosida olingan yelimlarni ishlatish maqsadga muvofiq. Epoksid smolasi, poliuretanlar asosidagi universal yelimlar va super yelimlar polimer qismlar va buyumlarni yelimlashi samarali.


11.5. Polimer buyumlarning turlari
11.5.1. Konstruksion va to'siq materiallari


Konstruksion material sifatida dispers tolasimon armaturalar bilan kuchaytirilgan shishaplastiklar, yog'ochqatlamli plastiklar, sotoplastlar, organik shisha, viniplast listlar, polimer qorishmalar, polimerbetonlar va boshqalar ishlatiladi.
Shishaplastiklar kompozitsion listli material bo'lib, shisha tolali to`ldirgich va polimer bog'lovchilar asosida olinadi. Listli asos sifatida shisha tolali to'qima va noto'qima matolar ishlatiladi. Ular fenol­formaldegid, poliefir va epoksid polimerlari asosida tayyorlanadi.
Shishaplastlar shisha tolali to`ldirgichning turi va joylashishiga nisbatan uchta asosiy guruhga bo'linadi: shisha tolali anizatrop material (SVAM), qirqilgan tola asosida olingan shishaplast va shisha mato asosida tayyorlanadigan shishaplast (shisha tekstolit). Shisha shpon listlar paketi issiq holda presshab tayyorlanadi. Shisha
shpon bir tomonga yo'naltirilgan shisha iplarni epoksid-fenol polimerlari asosida kompozitsiyalar bilan yelimlab yopishtirilgan yupqa matodir. SVAM uzunligi 1000 mm gacha, eni 500 mm gacha va qalinligi 1-30 mm. Uning zichligi 1,8-2 g/m³,cho'zilishdagi mustahkamlik chegarasi 1000 MPa gacha, kimyoviy va biologik aktiv muhitlarga bardoshli material. SVAM osma panellar, fazoviy yopma konstruksiyalar, quvurlar, yirik hajmdagi idishlar tayyorlashda ishlatiladi.