Qonuni aholi bandligi to‘G‘risida

90-modda. Kasbiy standart loyihasini ko‘rib chiqish
O‘zbekiston Respublikasi Bandlik va mehnat munosabatlari vazirligi:
kasbiy standart loyihasini avval belgilangan tartibda tasdiqlangan va ro‘yxatdan o‘tkazilgan xuddi shunday kasbiy standart mavjudligi (mavjud emasligi) yuzasidan tekshiradi;
kasbiy standart loyihasini o‘z rasmiy veb-saytiga jamoatchilik muhokamasi uchun joylashtiradi;
kasbiy standart loyihasining ekspertizasini amalga oshiradi, shu jumladan shartnoma asosida ekspertlarni jalb etgan holda amalga oshiradi;
ijobiy xulosa mavjud bo‘lgan taqdirda, kasbiy standart loyihasini ekspert xulosasi bilan birga Respublika kengashiga ko‘rib chiqish uchun yuboradi;
kasbiy standart tasdiqlanganidan so‘ng uni davlat ro‘yxatidan o‘tkazishni amalga oshiradi;
kasbiy standart davlat ro‘yxatidan o‘tkazilganidan so‘ng tegishli axborotni ishlab chiquvchiga uch ish kuni davomida yuboradi.
Kasbiy standart loyihasini har qanday bosqichda ko‘rib chiqish chog‘ida bartaraf etiladigan kamchiliklar va fikr-mulohazalar aniqlangan taqdirda, o‘n kalendar kun ichida ishlab chiquvchiga loyihani maromiga yetkazish uchun fikr-mulohazalar va tavsiyalar yuboriladi.
Kasbiy standartning maromiga yetkazilgan loyihasi ishlab chiquvchi tomonidan qayta kiritiladi hamda O‘zbekiston Respublikasi Bandlik va mehnat munosabatlari vazirligi tomonidan yangidan kiritilgan loyiha sifatida ko‘rib chiqiladi.
Kasbiy standart Respublika kengashining xulosasi asosida tasdiqlanadi.
91-modda. Kasbiy standartni qayta ko‘rib chiqish
Kasbiy standartlarni qayta ko‘rib chiqish O‘zbekiston Respublikasi Bandlik va mehnat munosabatlari vazirligi tomonidan besh yilda kamida bir marta amalga oshiriladi.
Quyidagilar kasbiy standartni majburiy ravishda qayta ko‘rib chiqish va almashtirish uchun asos bo‘ladi:
xodimning mehnat vazifalari, bilim va malakalari o‘zgarishiga sabab bo‘lgan ishlab chiqarish hamda mehnatni tashkil etishdagi muhim o‘zgarishlar, yangi texnologiyalar va tashkiliy-texnik tadbirlarning joriy etilishi;
mehnat sharoitlariga doir noto‘g‘ri belgilangan talablarning aniqlanishi;
ish beruvchilar va xodimlarning kasbiy standartni qayta ko‘rib chiqish yoki almashtirish yuzasidan asoslantirilgan takliflar bilan murojaat etishi.
Kasbiy standartni qayta ko‘rib chiqish (almashtirish) bo‘yicha ishlarni bajarishga iqtisodiyotning tegishli tarmoqlari mutaxassislari jalb etiladi.