Qonuni aholi bandligi to‘G‘risida

64-modda. Ish qidirayotgan shaxslarni va ishsiz shaxslarni kasbga o‘qitishga doir davlat buyurtmasi parametrlari
Ish qidirayotgan shaxslarni va ishsiz shaxslarni kasbga o‘qitishga doir davlat buyurtmasi parametrlari:
rivojlantirish dasturlariga kiritilgan loyihalarni amalga oshirish doirasida yangi ishlab chiqarish quvvatlarini ishga tushirish yoki mavjud ishlab chiqarish quvvatlarini kengaytirish;
yangi xizmat ko‘rsatish va servis obyektlarini ishga tushirish, yangi uy-joylar, ishlab chiqarish, ijtimoiy va bozor infratuzilmasi obyektlarini qurish;
qishloq xo‘jaligi ekinlari hosildorligi hajmlarini oshirish hisobiga qishloq xo‘jaligi mahsulotlari yetishtirish hajmlarini kengaytirish, yangi bog‘lar, tokzorlar barpo etish, chorva mollari sonini ko‘paytirish;
aholi tadbirkorlik faolligining o‘sishi, yangi tadbirkorlik, hunarmandchilik subyektlarini tashkil etish, tijorat banklari tomonidan tadbirkorlik subyektlariga kreditlar ajratish;
investitsiya loyihalarini va xususiylashtirilgan tashkilotlarni rivojlantirish “yo‘l xaritalari”ni amalga oshirish, foydalanilmayotgan xonalarni va binolarni ishlab chiqarish faoliyatini tashkil etish uchun investitsiya majburiyatlari hamda ijtimoiy majburiyatlar asosida “nol” xarid qiymati bo‘yicha berish hamda davlat mulki bo‘lgan obyektlarni ijaraga berish munosabati bilan zarur ish o‘rinlari sonini aniqlash asosida hisob-kitob qilinadi.
Ish qidirayotgan shaxslarni va ishsiz shaxslarni kasbga o‘qitishga doir davlat buyurtmasi parametrlari hududlar kesimida, kasbga o‘qitishning har bir turi bo‘yicha moliyalashtirishning prognoz hajmlari ko‘rsatilgan holda O‘zbekiston Respublikasi bandlik va mehnat munosabatlari vaziri tomonidan tasdiqlanadi.
Ish qidirayotgan shaxslarni va ishsiz shaxslarni kasbga o‘qitishga doir davlat buyurtmasi parametrlari O‘zbekiston Respublikasi Bandlik va mehnat munosabatlari vazirligining rasmiy veb-saytiga joylashtiriladi.
65-modda. Kasbga o‘qitishga doir davlat buyurtmasini shakllantirish
Mahalliy mehnat organlari har yili prognoz yilidan oldingi yilning 1-oktabriga qadar kelgusi kalendar yil uchun mo‘ljallangan ish qidirayotgan shaxslarni va ishsiz shaxslarni kasbga o‘qitishga bo‘lgan prognoz talabni shakllantiradi hamda hududiy mehnat organlariga taqdim etadi.
Hududiy mehnat organlari har yili prognoz yilidan oldingi yilning 1-noyabriga qadar kelgusi kalendar yil uchun mo‘ljallangan kasbga o‘qitishga doir davlat buyurtmasining hajmi va yo‘nalishlari bo‘yicha talabni shakllantiradi hamda O‘zbekiston Respublikasi Bandlik va mehnat munosabatlari vazirligiga taqdim etadi.
O‘zbekiston Respublikasi Bandlik va mehnat munosabatlari vazirligi har yili prognoz yilidan oldingi yilning 1-dekabriga qadar ish qidirayotgan shaxslar va ishsiz shaxslar sonini, mehnat bozorining joriy holati va uni rivojlantirish istiqbollarini hamda O‘zbekiston Respublikasi Bandlikka ko‘maklashish davlat jamg‘armasining moliyalashtirish hajmlarini tahlil qilish asosida hududlar va kasbga o‘qitish turlari kesimida kasbga o‘qitishga doir davlat buyurtmasi parametrlarini shakllantiradi.