Qonuni aholi bandligi to‘G‘risida

33-modda. Maqbul keladigan ish
Dastlabki kasbiy tayyorgarlikni talab qilmaydigan ish, bunday ishni topib berish imkoniyati bo‘lmagan taqdirda esa birinchi marta ish qidirayotgan, kasbga (mutaxassislikka) ega bo‘lmagan shaxslarning yoshga doir va boshqa xususiyatlari hisobga olingan holda haq to‘lanadigan boshqa ish, shu jumladan vaqtinchalik xususiyatga ega bo‘lgan ish ushbu shaxslar uchun maqbul keladigan ish hisoblanadi.
Ishdan va ish haqidan (mehnat daromadidan) mahrum bo‘lgan shaxslar uchun ularning kasbiy tayyorgarligiga mos bo‘lgan, yoshi, sog‘lig‘ining holati, mehnat staji va avvalgi kasbi (mutaxassisligi) bo‘yicha ish tajribasi inobatga olinadigan ish maqbul keladigan ish hisoblanadi.
Quyidagi hollarda ish maqbul keladigan ish deb hisoblanishi mumkin emas, agar:
ushbu ish yashash joyini o‘zgartirish bilan bog‘liq bo‘lsa;
taklif etilgan ish doimiy yashash joyidan ancha uzoq bo‘lsa va transportda qatnash jihatdan qulay bo‘lmasa. Ish joyining transportda qatnash jihatdan qulayligi (yo‘l qo‘yilishi mumkin bo‘lgan uzoqligi) mazkur joydagi jamoat transporti tarmog‘ining rivojlanganligi hisobga olingan holda hududiy mehnat organlari tomonidan belgilanadi;
taklif etilgan ishni rad etish sog‘liqning holatiga, yoshga va boshqa uzrli sabablarga ko‘ra mavjud bo‘lgan qarshi ko‘rsatmalar bilan asoslangan bo‘lsa.
Ishsizlik nafaqasini olish davri tugaganidan so‘ng kasbi (mutaxassisligi) bo‘yicha ish topib berish imkoni bo‘lmagan taqdirda, ishsiz shaxsning qobiliyati, sog‘lig‘i holati, ilgarigi ish tajribasi va uning uchun qulay bo‘lgan o‘qitish vositalari inobatga olingan holda kasbini (mutaxassisligini) o‘zgartirishini talab qiladigan ish maqbul keladigan ish deb hisoblanishi mumkin.
Mahalliy mehnat organida ish qidirayotgan shaxs sifatida ro‘yxatga olingan har bir shaxsga ushbu mehnat organi xodimi tomonidan uning kasbiy tayyorgarligiga mos bo‘lgan, yoshini, sog‘lig‘ining holatini, mehnat stajini hamda avvalgi kasbi (mutaxassisligi) bo‘yicha ish tajribasini hisobga oladigan maqbul keladigan ish (mavjud bo‘lgan taqdirda) taklif etiladi.
Aholining ijtimoiy ehtiyojmand toifalaridan bo‘lgan shaxslar uchun maqbul keladigan ishni qidirish mavjud bo‘sh (vakant) ish o‘rinlari yoki zaxira qilingan ish o‘rinlari orasidan amalga oshiriladi.
Ish taklif etish va ish qidirayotgan shaxslarni ishga joylashtirish faqat maqbul keladigan ishga nisbatan amalga oshiriladi.
Ish qidirayotgan shaxsga maqbul keladigan ishga doir har bir taklif to‘g‘risidagi ma’lumotlar “Bandlik xizmati” axborot tizimiga kiritiladi.