Qarori jinoyat-ijroiya qonunchiligini tubdan takomillashtirish chora-tadbirlari to‘G‘risida

IV. Konsepsiyani amalga oshirishdan ko‘zlangan natijalar

Jinoyat-ijroiya qonunchiligini yanada takomillashtirish, undagi huquqiy bo‘shliq va ziddiyatlarni bartaraf etish, milliy xususiyatlar va sharoitlarni e’tiborga olgan holda xalqaro standartlar va ilg‘or xorijiy tajribani implementatsiya qilish.

Bunda quyidagi maqsadlarga erishish alohida ahamiyat kasb etadi:

mahkumlarni axloqan tuzatish, ularning huquqlariga so‘zsiz rioya etish, sha’ni va qadr-qimmati hurmat qilinishini ta’minlashning ishonchli va samarali mexanizmlarini yaratish;

jinoyat-ijroiya tizimi faoliyatining shaffofligi va oshkoraligini ta’minlash ustidan jamoatchilik nazoratini takomillashtirish;

mahkumlarni axloqan tuzatishda davlat hokimiyati va fuqarolarning o‘zini o‘zi boshqarish organlari, korxona, tashkilot, muassasa, jamoat birlashmalari va fuqarolarning ishtiroki institutini kuchaytirish;

jazoni ijro etish tizimi faoliyatiga zamonaviy shakl va usullarni hamda ilg‘or axborot-kommunikatsiya texnologiyalarini keng joriy etish.

Konsepsiyani amalga oshirishning pirovard natijasi mahkumlarni axloqan tuzatish, ularning jinoiy faoliyatining oldini olish, shuningdek, boshqa shaxslar tomonidan jinoyat sodir etilishiga chek qo‘yishning samarali tizimini yaratish hisoblanadi.