Pán: Ádebiyat Klass: 6 Waqtı

Mıńlardıń biri
(povestten úzindi)
Pútkil Xorezmniń tolısın tógip, ortasın shayqaǵan 1912-jılǵı «Aq qapshıq» jılı edi. Bul jıl Erpolatlar sıyaqlı jetim bala, jesir qatınlardıń ókpesin qısıp, demin tarıltıw menen qatar, talay jarlılardıń janın kózine kórsetken jıl. Jaqsı, pútin kiyim kiygen, janı saw, oshaq bası amanlardıń janı kózine kóringende Erpolatlar kimniń shikarası, ólim záńgisine ayaǵın salıp turǵan adamlar emes pe? Ákesi Batırbek ólgende Erpolat altı jasqa jańa shıqqan bala eken. Ol atanıń álpeshlegen tárbiyasın kóre almadı.Erpolat segiz jasına shıqqannan soń-aq hárkimniń ılaq-qozısın, buzawın baǵıp tamaq tawıp apasına kómeklesti. «Ílaq mańırap suw isher» degendey, jetim bala, jesir qatın, jılap-sıqlap kún keshirdi. Erpolat er jetti, jigit boldı, mine bıyıl sarras jigirmaǵa shıqtı. Bunıń jigirmaǵa shıǵıp jigit bolıwın kútip turǵanday asharshılıq baslanıp, tamaǵın birde tawıp, birde tappay otırǵan adamlarǵa oǵada qıyın boldı. Jazı menen jıynaǵan onseri-qırqaǵarı* ǵállesin de iship boldı, kún keshiriw qıyınlastı. Shappattay nan, attıń pulı, erdiń qunı, bolıp ketti. Sonlıqtan, Erpolat 5 — 6 kúnnen bermaǵan diywanashılıq qılıp apasın hám eki úkesin asırap otır edi. Búgin de sol diywanashılıqtan qaytıp kiyatır edi.Ayımgúldiń de, Erpolattan kishi eki balasınıń da nár tatpaǵanına búgin eki kún boladı. Mehriban anaǵa bawır eti bala artıqmash, qımbat emes pe, eki bala ashtan buratılıp jatır. Kishkene qızı Qarashash:
— Apa júregim úzilip baratır, — dep Ayımgúldiń moynın qushaqlay jıǵılıp, oń dizesine basın qoyıp, anda-sanda «nan» dew menen ıńıranıp jattı...