Pán: Ádebiyat Klass: 6 Waqtı

Rawajlandırıw maqset:

• 
  Oqıwshılardı óz pikirlerin erkin bayanlay alıw,kommunikativlik qatnastı payda etiw,axborot hám jańa siyasıy xabarlardan xabardar bolıw, matematikalıq sawatxanlılıq hám ilim-pán texnikalar menen islesiw sıyaqlı tayanısh kompetenciyaların rawajlandırıw.
  

Tárbiya beriwshilik maqset:

• 
  Oqıwshılardıń toparlarda óz-ara doslıqta birge islesiwdi,oqıwshılardı ádep-ikramlılıqqa, jaqsı pazıyletlerdi qáliplestiriw hám adamgershilik sezimlerdi qáliplestirip tárbiyalap barıw.
  

Sabaqqa kerekli oqıw quralları: Taxta,por,qaǵazlar,saat,tarqatpalı materiallar,marker h.t.b
I.Sabaqtıń barısı:
Shólkemlestiriw. (3 minut)
-Klass oqıwshıları menen sálemlesiw;
-Klastıń tazalıǵına itibar beriw,sabaqlıqlarınıń bari-joqlıǵın qadaǵalayman;
-Náwbetshi arqalı qatnastı barlayman.
II.Úyge tapsırma soraw: (14 minut) Muhammed Yusup ómiri hám dóretiwshiligi. “Watanım” qosıǵı Ótken sabaqta úyge berilgen tapsırmanı oqıwshılardıń eslerine túsiremen hám jurnalda bahası az oqıwshılardan úyge berilgen tapsırmanı sorayman. Úyge berilgen tapsırmanı orınlamay kelgenlerden ne sebep orınlamay kelgenligin anıqlastıraman.
III.Taza tema túsindiriw: (15 minut) Baqlaw jumısı.
Úyrektiń uyası
(Gúrriń)
Asıǵa kútken dem alıs kúni de keldi. Olar háp zamatta qaladan sırtqa shıǵıp, suw aǵıp turǵan kanaldıń tuw sırtındaǵı alańlıqqa jetip keldi. Bul jer burın egin egilmegen, mayda qamıslıq hám soralıq qaplap ketken dalańlıq edi. Aǵası bolsa qolındaǵı beli menen iri-iri shóplerdi shawıp, bir jerlerdi tegislep júr. Gózzal menen Sáwle shapqılasıp júrip, ırashtıń boyındaǵı shoqlaw bolıp ósken soralıq penen qamıslıqqa jaqınlasa bergeni, bir nárse “pırr” etip aspanǵa kóterildi. Bular ne ekenin bilmey ań-tańı shıǵıp qarap turǵanda, aǵası “Haw, úyrek ǵoy”, dedi. “Bul ne qılıp qurı dalańlıqta júripti”. Solay dedi de, jumısın toqtatıp, úyrek ushqan jerge jetip keldi. Qarasa, úyrek uya basqan eken. Gózzal menen Sáwle buǵan hayran qaldı. Olar ele jabayı úyrektiń uyasın hesh kórmegen edi. Uyada on úsh máek bar eken. Olar tap adam qolı menen qoyǵanday puqtalıq penen qatarlasıp jaylasqan eken. Gózzal shıdamay qızıq kórip, máektiń birewin alayın dep edi, aǵası ruxsat etpedi. Keyin ol kózden tasa bolsın degendey uyanıń dógeregin jıńǵıl hám soralar menen qorshaladı. (Z. Ishmanova, 156 sóz).
Bayan jobası:

1. 
   Qızlar dem alıs kúni aǵası menen qayda bardı?
   
2. 
   Gózzal menen Sáwle neni kórdi?
   
3. 
   Aǵası úyrekti ne qıldı?
   

V.Oqıwshılardı bahalaw hám úyge tapsırma beriw: (3 minut) Ótilgenlerdi tákirarlaw.Úyge berilgen tapsırmanı orınlaǵan hám sabaq barısında aktiv qatnasıp, berilgen qosımsha sorawlarǵa juwap berip otırǵan oqıwshılarǵa tiyisli bahaların qoyaman. Oqıwshılar menen xoshlasıp, búgingi sabaqtı juwmaqlayman.
Tayarlaǵan: Z.Qalekeeva