“Педагогика” фанини ўқитиш бўйича ўқув-услубий мажмуа

Мужассамлаштирилган таълим ўқув материалларини ўқувчиларнинг билиш хусусиятларига имкон қадар мослаштиришни ифодалайди. Унга кўра машғулотлар яхлит мавзуни муайян қисмларга бўлиб ўзлаштирилишга йўналтирилади. Ўқув материалларини бу тарзда ўзлаштириш билиш имкониятлари турлича бўлган талабалар томонидан мавзу моҳиятининг пухта англанишига ёрдам беради. Методни қўллашда ўқувчилар қобилияти динамикасини ҳисобга олувчи таълим методлари қўлланилади.
Модул таълими ўқув материалларини боблар, бўлимлар ёки параграфлар мажмуи тарзида ўрганилишини таъминлайди. Боб, бўлим ёки параграфлар мажмуи блоклар тарзида яхлитланади. Бу таълим турини қўллаш ўқувчи (талаба)ларни янги педагогик билимлар, замонавий ПТ ҳамда илғор дидактик воситалардан хабардор қилишда самарали саналади. Мазкур таълим туридан ўқувчиларнинг мустақил таълим олишларини йўлга қўйиш, уларни ўқув материаллари билан таъминлаш ва ўқув фаолиятлари юзасидан мониторингни ташкил этишда фойдаланиш мумкин. Модул таълими ўқувчиларни масофада ҳам самарали натижаларни беради. Бунда ўқувчилар блокларда чоп этилган ёки компьютер варианти кўринишидаги ўқув материаллари билан таъминланадилар. Ўқувчилар ўқув материалларини ўрганганларидан сўнг уларга назарий билимларини мустақил баҳолаш, уларни мустаҳкамлашга хизмат қиладиган топшириқ (машқ)лар юборилади.
Ривожлантирувчи таълим талабаларнинг ички имкониятлари ва уларни рўёбга чиқаришга йўналтирилади. Ушбу таълим турига кўра машғулотларда амалий тренинглардан кенг фойдаланилади. Амалий тренинглар талабаларда педагогик билимларни самарали ўзлаштиришга ёрдам бериш билан бирга уларнинг имкониятлари тўла рўёбга чиқишини таъминлайди. Ўқув машғулотларида ривожлантирувчи таълим элементи сифатида тақдимот методидан фойдаланиш ҳам кутилган натижаларни беради. Бу метод талабаларда педагогик фаолиятни ташкил этишга нисбатан ижодий ёндашиш, ўз устида ишлаш, мустақил таълим олиш кўникмаларини ҳам ривожлантиради. Тадқимот методидан семинар машғулотларда талабаларнинг билимларини баҳолаш мақсадида фойдаланиш мумкин.