“Педагогика” фанини ўқитиш бўйича ўқув-услубий мажмуа

2. “Ротация” методи мавзуни кичик гуруҳларда ўрганиш, асосий ғояларни ёзма баён қилиш ҳамда гуруҳлар томонидан тақдим қилинган ишларни жамоа иштирокида таҳлил қилиш имконини беради. Машғулот жараёнида методни қўллашда қуйидаги тартибда иш кўрилади: 1) ўрганилаётган мавзуга доир топшириқлар ёзма равишда баён қилиниб, ёзув тахтасига осиб қўйилади; 2) талабалар топшириқлар сонига кўра гуруҳларга бириктириладилар; 3) гуруҳлар ихтиёрий равишда топшириқлар пакетини танлайдилар ва топшириқни бажаришга киришадилар; 4) топшириқнинг ечими ёзма баён қилинади ва гуруҳ ишининг ажратиб олиш осон бўлиши учун пакет устига махсус белгилар қўйилади; 5) топшириқнинг ечими баён қилинган пакетлар гуруҳлар ўртасида ўзаро алмаштирилади; 6) барча топшириқларнинг мазмуни гуруҳлар томонидан ўрганилиб бўлгач, топшириқлар пакетлари йиғиб олинади ва ечимлар умумлаштирилади; 7) ечимлар жамоада муҳокама қилиниб, энг тўғри жавоб танлаб олинади.


3. “Баҳс-мунозара” методи икки ёки ундан ортиқ шахслар томонидан муайян вақт оралиғи ва қатъий қоидаларга мувофиқ ташкил этиладиган оғзаки баҳси бўлиб, талабаларда ўрганилаётган мавзу бўйича эркин, асосли фикрларни билдириш қобилиятларини шакллантиришга хизмат қилади. Ўқув машғулотларида баҳс-мунозарадан фойдаланишда мавзуга доир маълум масалалар ҳал қилинади. Методни қўллашда қуйидаги тартибда иш кўрилади: 1) баҳс-мунозара учун танланадиган мавзу (масала) талабаларга олдиндан маълум қилинади; 2) жараён бошловчи томонидан бошқарилиб борилади; 3) талабалар индивидуал ёки гуруҳ (жуфтлик) номидан баҳс юритилаётган масала бўйича шахсий мулоҳазаларни баён қиладилар; 4) баҳсда масаланинг моҳияти, ечими бўйича бир-бирига зид фикрлар илгари сурилади; 5) ечим бўйича асосий фикрни баён этадиган талабаларга 10 минут, қўшимча қилиш истагида бўлганларга эса 5 минутдан вақт берилади; 6) бир талабага икки марта сўзга чиқишга рухсат этилмайди; 7) бошловчи талабаларнинг мавзудан четга чиқмасликларини қатъий назорат қилиб боради, борди-ю, шундай ҳолатлар содир этилса, сўзловчилар бу ҳақида огоҳлантириладилар; 8) баҳс-мунозара юзасидан якуний хулоса бошловчи томонидан билдирилади.