Pedagogik mahorat fanidan oraliq nazorat savollari Pedagogik texnika va uning tarkibiy qismlari

Sharq mutafakkirlarning ustoz- mudarrislar haqidagi qarashlar.Buyuk allomalarimiz o'z asarlarida mudarrislar kasbining nozikligini, mas'uliyatli ekanligini va murakkabligini, shu bilan birga sharafli ekanligini, yoritib, muallimning mahorati, ularga qo'yilgan talablar, fazilatlariga oid qarashlar, shogirtlar bilan munosabatga kirishish mahorati, muomalasi to'g'risida o'z mulohazalarini bildirganlar. Uyg'onish davrining yetuk namoyondalarining ijodiy merosi pedagogik tafakkurni shakllantirishda bo'lajak murabbiylarga muhim manba bo'lib hisoblanadi.Abu Nasr Forobiy ta'lim-tarbiyaga 1bo'lib ta'rif bergan olim hisoblanadi." Ta'lim degan so'z- insonga o'qitish, tushuntirish asosida nazariy bilim berishdir.Tarbiya esa-shaxsiy fazilatlarni, mas'ul hunarni egallash uchun zarur bo'lgan xulq normalarini va amaliy malakalarni o'rgatishdir!"-deydi olim.Forobiy o'zining didaktik qarashlari orqali ustoz, o'qituvchining mas'uliyatini alohida ifodalaydi. "Ustoz,-deydi u,- shogirdlariga qattiq zulm ham, haddan tashqari ko'ngilchanlik ham qilmasligi lozim".
Chunki, ortiqcha zulm shogirdda ustozga nisbatan nafrat uyg'otadi, bordi-yu ustoz juda yumshoq bo'lsa, shogirt uni mensimay qo'yadi va u beradigan bilimdan sovib qoladi. Beruniy o'zining ta'lim-tarbiyaga oid qarashlarini "Qadimgi xalqlardan qolgan yodgorliklar", " Hindiston", "Mineralogiya", " Kitob as-Saydana" kabi asarlarda bayon etgan. U o'z asarlarida dunyoni ilmiy bilish yo'llarini ko'rsatib berdi. Beruniyning fikricha, kishining aql bilan o'ylashi, xayol surishi, fikrlashi-bu uning bilim jarayonini manbai hisoblanadi. Beruniy ta'lim-tarbiyaga o'quvchilarning diqqatini jalb qilish, mashg'ulotlar davomida o'quvchini zeriktirib qo'ymaslik uchun ta'lim olishning turli yo'llari, shakl va metodlari ustida to'xtaladi. U: "Bizning maqsadimiz o'quvchini toliqtirmaslik, hadeb narsa o'qib berish zerikarli bo'ladi va toqatni toq qiladi. Agar o'quvchi bir masaladan boshqa bir masalaga o'tib tursa, u xuddi turli-tuman bog'larda sayr qilgandek bo'ladi..."-deb ta'kidlaydi.