O’zbekiston respublikasining soliq kodeksi I bo’lim. Umumiy qoidalar

87-modda. Soliq hisobotini saqlash muddati 
 
Soliq to’lovchilar va soliq agentlari soliq hisobotini, shuningdek soliq 
hisobotiga ilova qilinadigan hujjatlarni, agar ushbu Kodeksda boshqacha qoida 
belgilanmagan bo’lsa, ushbu hisobot taqdim etiladigan yildan keyin kamida besh yil 
saqlashi shart. 
Agar soliq to’g’risidagi qonun hujjatlari soliq stavkasini, to’lanadigan soliq 
miqdorini, soliq imtiyozini yoki soliq chegirmasini qo’llashni va (yoki) soliqni 
to’lash muddatini o’zgartirishni soliq to’lovchining muayyan shartlarga rioya etishi 
bilan bog’lasa, ushbu soliq to’lovchi barcha tasdiqlovchi hujjatlarni mazkur 
shartlarning amal qilishi tugaydigan yildan keyin kamida besh yil saqlashi lozim. 
Bunday tasdiqlovchi hujjatlar jumlasiga, xususan, ushbu soliq bo’yicha soliq 
hisoboti, shu soliq hisobotiga ilova qilinadigan hujjatlar, shuningdek ko’rsatilgan 
shartlarga yoki majburiyatlariga rioya etilganligini tasdiqlovchi hujjatlar kiradi. 
Ushbu qismning qoidalari, agar ko’rsatilgan shartlar yoki majburiyatlar vaqtinchalik 
tusga ega bo’lsa va ularga rioya etilishini hujjatlar bilan tasdiqlashni talab qilsa, 
qo’llaniladi. 
III BO’LIM. SOLIQ MAJBURIYaTINI BAJARISh 
 
9-bob. Soliq majburiyatini bajarishning umumiy qoidalari 
 
88-modda. Soliq majburiyati 
 

---

84 
Soliq to’g’risidagi qonun hujjatlariga binoan soliq to’lovchilar bo’lgan yuridik 
va jismoniy shaxslarning zimmasiga yuklangan soliqlarni to’g’ri hisoblab chiqarish 
hamda o’z vaqtida to’lash majburiyati ularning soliq majburiyati deb e’tirof etiladi. 
Soliq to’g’risidagi qonun hujjatlariga binoan soliq agentlarining zimmasiga 
yuklangan, ushbu shaxslar qaysi soliqlarga nisbatan soliq agentlari deb e’tirof etilsa, 
o’sha soliqlarni to’g’ri hisoblab chiqarish va o’z vaqtida o’tkazish majburiyati soliq 
majburiyatiga tenglashtiriladi. 
Soliq majburiyati ushbu Kodeks yoki soliq to’g’risidagi boshqa qonun hujjati 
bilan belgilangan asoslar mavjud bo’lganda yuzaga keladi, o’zgaradi va tugaydi. 
Har bir soliqqa nisbatan soliq majburiyati soliq to’lovchiga soliq to’g’risidagi 
qonun hujjatlarida ushbu soliqning to’lanishini nazarda tutuvchi holatlar yuzaga 
kelgan paytdan e’tiboran yuklanadi.