O’zbekiston respublikasining soliq kodeksi I bo’lim. Umumiy qoidalar

208-modda. Aktiv chet el kompaniyalari va aktiv 
xolding kompaniyalari 
O’z moliyaviy hisoboti ma’lumotlariga ko’ra moliya yilida passiv faoliyatdan 
olingan daromadlarining ulushi ko’rsatilgan davr uchun daromadlarining umumiy 
summasida 20 foizdan ko’p bo’lmagan miqdorni tashkil etgan chet ellik yuridik 
shaxs ushbu Kodeks maqsadlarida aktiv chet el kompaniyasi deb e’tirof etiladi. 
Ustav kapitalida (fondida) O’zbekiston Respublikasi yuridik shaxsi bo’lgan 
nazorat qiluvchi shaxsning bevosita ishtirok etish ulushi ketma-ket keladigan 
kamida uch yuz oltmish besh kalendar kun ichida kamida 75 foizni tashkil etgan chet 
ellik yuridik shaxs ushbu Kodeks maqsadlarida chet el xolding kompaniyasi deb 
e’tirof etiladi. 
Agar chet el xolding kompaniyasiga nisbatan quyidagi shartlarga bir vaqtning 
o’zida rioya qilinsa, ushbu chet el xolding kompaniyasi ushbu Kodeks maqsadlarida 
aktiv chet el xolding kompaniyasi deb e’tirof etiladi: 
1) uning passiv faoliyatdan olingan daromadlarining ulushi (bundan aktiv chet 
el kompaniyasidan olingan dividendlar mustasno) ulushi moliyaviy hisobot 
ma’lumotlariga ko’ra moliya yilidagi daromadlarining umumiy summasida 5 
foizdan oshmasa; 
2) ushbu modda uchinchi qismining 1-bandida ko’rsatilgan ulushni hisob-kitob 
qilish chog’ida dividendlari passiv faoliyatdan olingan daromadlar tarkibidan 
chiqariladigan har bir aktiv chet el kompaniyasining ustav kapitalida (fondida) uning 
bevosita ishtirok etish ulushi ketma-ket keladigan kamida uch yuz oltmish besh 
kalendar kun ichida kamida 50 foizni tashkil etsa. 
Ushbu modda maqsadlarida moliya yili deganda, chet ellik yuridik shaxsning 
shaxsiy qonuniga muvofiq vaqtning moliyaviy hisobot tuziladigan davri, uning 
moliyaviy hisoboti deganda esa ushbu yuridik shaxsning konsolidatsiya qilinmagan 
moliyaviy hisoboti tushuniladi. 
Qaysi faoliyat turini amalga oshirishdan olingan daromad soliq solish 
maqsadida passiv faoliyatdan olingan daromad deb qaralsa, o’sha faoliyat turlari 
ushbu Kodeksning 209-moddasiga muvofiq aniqlanadi.