Microsoft Word togaymurod otamdan qolgan dalalar lotin ziyouz com doc

www.ziyouz.com
kutubxonasi 
66
— Hali erta, erta! Bu dunyoni ishidan mozorga kirib qutulmasam, qutulmayman! 
Men eshagimga tushlik solinmish xurjunimni tashladim. Ayolimizga tayinladim: 
— Dalaga ertaroq bor, — dedim. 
12 
Texnika oy bilan bo‘ylashsa-da, ketmonsiz dala — dala bo‘lmaydi. 
Men traktor ketiga to‘rt qator tish uladim. Har qator orasida ikkitadan pichoq qo‘ydim. Har qator 
orasida bittadan o‘qsimoya panja qo‘ydim. 
G‘o‘zalarim ostini haydadim. G‘o‘zatomir qirqilmasin yo lat yemasin deya, olti-etti santim 
chuqurlik-da haydadim. 
Tish g‘o‘za bo‘g‘ziga tegmay-tegmay yurdi. 
Tish egat tuprog‘ini g‘o‘za bo‘g‘ziga uyub-uyub yurdi. 
Oqibat — g‘o‘za bo‘g‘iz ko‘milib qoldi. G‘o‘za bo‘g‘iz qotib qoldi. G‘o‘za bo‘g‘iz nafas ololmay 
qoldi. 
Bu bois, dalalarimga ketmon soldim. 
Botirib ketmon solayin, dedim — g‘o‘zatomir qirqilajak bo‘ldi. 
Sayoz ketmon solayin, dedim — g‘o‘zatomir ostda qolajak bo‘ldi. 
Men ketmonimga erk bermayin-erk bermayin ketmon soldim. 
 
13 
G‘o‘zalarim bir oylik bo‘ldi. 
Ana shunda bir shamol turdi, bir shamol turdi. 
Afg‘on shamoli deyin dedim — shamol Hisor tarafdan esdi. 
Shamol g‘o‘zalarimni bir chapga qayirdi, bir o‘ngga qayirdi. 
G‘o‘zalarim ayqash-uyqash bo‘lib qoldi. G‘o‘zalarim bukchayib-bukchayib qoldi. G‘o‘zalarim 
yotib-yotib qoldi. 
Pushtalarda tizilmish ko‘klar g‘o‘za bo‘ldimi yo boshqa bir maysa bo‘ldimi — bilib bo‘lmay qoldi. 
Men nahor-nahorlab dalalarim boshida cho‘k tushdim. 
Yotib-yotib qolmish g‘o‘zalarimni qo‘shqo‘llab-qo‘shqo‘llab rostladim. 
Ayqash-uyqash g‘o‘zalarimni kaftlab-kaftlab taradim. 
G‘o‘zalarim tag‘in bo‘y-bo‘yladi. 
 
14
Majlis qaridi. 
— Siz bilan biz hali-hamon dotatsiyada yashaymiz, o‘rtoqlar! — deya yakunladi raisimiz. — 
Dotatsiyadan qutulish uchun qo‘lni qo‘lga berib mehnat qilmasak bo‘lmaydi! Dotatsiyadan qutulaylik, 
ana undan keyin odamday yashasak bo‘ladi! 
Qabatimda o‘tirmish brigadir qulog‘iga shivirladim: 
— Qaerda yashaymiz, deydi? — dedim. 
— Dotatsiyada, —deydi. 
— U qaerda? 
Brigadir tovoni bilan yer tepib ko‘rsatdi. 
— Shu yerda, — dedi. — Mana, mana shu yerda. Shuniyam bilmaysanmi, he, ko‘rsavod. 
Gapimizga tag‘in bir brigadir qo‘shildi. 
— Dotatsiyada yashaymiz degani, muttahamlarcha yashaymiz, degani-da? 

---

Tog‘ay Murod. Otamdan qolgan dalalar (roman)