Зиёвуддин Раҳим 2 бисмиллаҳир роҳМАНир роҳийм!

МУҲАММАД СОЛЛАЛЛОҲУ АЛАЙҲИ ВА САЛЛАМ ХОТАМУЛ 
АНБИЁДИРЛАР 
Муҳаммад соллаллоҳу алайҳи ва салламдан кейин пайғамбарлар келиши тўхтади. У зот 
пайғамбарлик қасрининг охирги ғиштидирлар. Аллоҳ таоло Расулуллоҳ билан рисолат силсиласини 
камолга етказди. Қуйидаги оят сўзимизни қувватлайди: 
“--------------------------- Арабий матн --------------------------“ 
“
(Эй мўминлар,)
Муҳаммад сизлардан бирон кишининг отаси эмас, балки Аллоҳнинг элчиси, 
пайғамбарлар сўнггисидир. Аллоҳ барча нарсани билувчи Зотдир”
(“Аҳзоб” сураси, 40-оят).
Набий соллаллоҳу алайҳи ва саллам шундай деганлар: “Албатта, менинг бир нечта исмларим бор. 
Мен Муҳаммадман, Аҳмадман, Моҳий – ўчирувчиман. Аллоҳ мен билан куфрни ўчиради. Мен Ҳошир – 
тўпловчиман. Одамлар қадамим остида тўпланишади. Мен Оқиб – ортидан бирон набий келмайдиган 
зотман” (Бухорий ва Муслим – Жубайр ибн Мутъим розияллоҳу анҳудан – ривоят қилган). 
Яна бир ҳадисда шундай дейилган: “Мен билан (қолган) анбиёлар мисоли худди гўзал қилиб 
қурилган қасрга ўхшайди. Унда бир ғишт ўрни қолдирилган. Томошабинлар (ўша бинони) айланиб 
кўриб, унинг гўзаллигидан ажабланишади, фақат ҳалиги ғишт ўрнидан бошқа айб топа олишмайди. Бас, 
мен ўша ғишт ўрнини тўлдирдим. Мен билан бино (қурилиши) якунланди, пайғамбарлар охирига етди” 
(Бухорий ва Муслим ривояти). 
Савбон розияллоҳу анҳу Расулуллоҳ соллаллоҳу алайҳи ва салламдан ривоят қилади: “Умматимдан 
(бўлган) қабилалар мушрикларни қувиб етмагунича, бут-санамларга сиғинмагунича қиёмат қоим 
бўлмайди. Албатта, умматимдан ўттиз нафар каззоб (алдоқчи, фирибгар) чиқади. Уларнинг ҳаммаси 
пайғамбарликни даъво қилади. Ваҳоланки, мен пайғамбарларнинг сўнггисиман. Мендан кейин пайғамбар 
бўлмайди” (Термизий саҳиҳ санад билан ривоят қилган). 
Бу ҳадисда ўзини мусулмон санаган кишилардан содир бўладиган айрим ишлар айтилиб, уларни 
инкор этишга, муолажа қилишга чақирилмоқда. Зеро, ҳақиқий мўмин одам ширкка рози бўлмайди, бирон 
кимса пайғамбарлик даъвоси билан чиқса, уни маъқулламайди, балки қаршилик кўрсатади. 
Кимда-ким Пайғамбаримиз соллаллоҳу алайҳи ва салламдан кейин пайғамбарлик даъвосини қилса, 
бу залолат, ҳавойи нафсга эргашишдан бошқа нарса эмас. Муҳаммад Мустафо соллаллоҳу алайҳи ва 
саллам пайғамбарлар сўнггиси эканлари аниқ собит бўлган. У зотдан сўнг пайғамбарман, деб чиққан 
кимсанинг гапи ёлғондир.