O’zbekiston respublikasining soliq kodeksi I bo’lim. Umumiy qoidalar

22-bob. BITIMLARNING TAQQOSLANADIGAN ShARTLARI 
 
186-modda. Bitimlarning tijoratga oid va moliyaviy
shartlarining taqqoslanishi 
 
Nazorat qilinadigan bitimlardagi daromadlarni soliq solish maqsadida aniqlash 
uchun O’zbekiston Respublikasi Davlat soliq qo’mitasi bunday bitimlarni yoki jami 
bunday bitimlarni (bundan buyon ushbu bo’limda tahlil etiladigan bitim deb 
yuritiladi) taraflari mustaqil shaxslar bo’lgan bitta yoki bir nechta bitim (bundan 
buyon ushbu bo’limda taqqoslanadigan bitimlar deb yuritiladi) bilan taqqoslashni 
amalga oshiradi. Bunday taqqoslash ushbu bo’limda nazarda tutilgan transfert narx 
belgilash chog’ida daromadlarni aniqlash uslublarini tanlash va ularni keyinchalik 
qo’llash maqsadida amalga oshiriladi. 
Ushbu Kodeks maqsadlarida taqqoslanadigan bitimlar, agar ular tahlil 
etiladigan bitimlar bilan bir xil tijoratga oid va (yoki) moliyaviy shartlarda 
tuziladigan bo’lsa, tahlil etiladigan bitim bilan taqqoslana oladigan deb e’tirof 
etiladi. 

---

183 
Agar taqqoslanadigan bitimlarning tijoratga oid va (yoki) moliyaviy shartlari 
tahlil etiladigan bitimning shartlaridan farq qiladigan bo’lsa, bunday bitimlar, agar 
tahlil etiladigan va taqqoslanadigan bitimlarning mazkur shartlari o’rtasidagi farqlar 
ularning natijalariga jiddiy ta’sir ko’rsatmasa, tahlil etiladigan bitim bilan taqqoslana 
oladigan deb e’tirof etilishi mumkin. Agar ushbu bitimlarning shartlaridagi farqlar 
shu bitimlar shartlariga va (yoki) natijalariga doir tegishli tuzatishlarni soliqqa solish 
maqsadida qo’llash yordamida hisobga olinishi mumkin bo’lsa, bunday bitimlar 
ham tahlil etiladigan bitim bilan taqqoslana oladigan bitimlar deb e’tirof etilishi 
mumkin. 
Bitimlarning taqqoslanishini aniqlashda, shuningdek bitimlarning tijoratga oid 
va (yoki) moliyaviy shartlarining tuzatishlarini amalga oshirish uchun tahlil 
etiladigan hamda taqqoslanadigan bitimlarning mustaqil shaxslar o’rtasidagi 
bitimlarning tijoratga oid va (yoki) moliyaviy shartlariga jiddiy ta’sir ko’rsatishi 
mumkin bo’lgan asosiy tavsiflarining tahlili o’tkaziladi. Bunday tahlil ushbu 
Kodeksning 187-moddasiga muvofiq o’tkaziladi.