O’zbekiston respublikasining soliq kodeksi I bo’lim. Umumiy qoidalar

57-modda. Moliyaviy ijara va lizing
 
Ushbu Kodeks maqsadlarida shartnoma bo’yicha mol-mulkni (moliyaviy ijara 
ob’ektini) o’n ikki oydan oshmaydigan muddatga egalik qilish va foydalanishga 
berish chog’ida yuzaga keladigan ijara munosabatlari moliyaviy ijara deb e’tirof 
etiladi. Moliyaviy ijara shartnomasi quyidagi talablarning loaqal bittasiga javob 
berishi kerak: 
1) moliyaviy ijara shartnomasining muddati tugagach moliyaviy ijara ob’ekti 
ijarachining mulkiga o’tadi; 
2) moliyaviy ijara shartnomasining muddati moliyaviy ijara ob’ekti xizmat 
qilish muddatining 80 foizidan oshmaydi yoki moliyaviy ijara ob’ektining moliyaviy 
ijara shartnomasi tugaganidan keyingi qoldiq qiymati uning birinchi qiymatining 
kamida 20 foizini tashkil etadi; 
3) moliyaviy ijara shartnomasining muddati tugagach ijarachi moliyaviy ijara 
ob’ektini moliyaviy ijara shartnomasida belgilanadigan qayd etilgan narx bo’yicha 
sotib olish huquqiga ega bo’ladi; 
4) moliyaviy ijaraning amal qilish muddati davrida ijara to’lovlarining joriy 
diskontlangan qiymati moliyaviy ijara ob’ektining uni moliyaviy ijaraga berish 
paytidagi joriy qiymatining 90 foizidan oshadi. Joriy diskontlangan qiymat 
buxgalteriya to’g’risidagi qonun hujjatlariga muvofiq aniqlanadi.
Ushbu kodeks maqsadlarida investitsiya faoliyatidan iborat bo’lgan moliyaviy 
ijaraning alohida turi lizing deb atalib, bunda bir taraf (lizing beruvchi) boshqa 
tarafning (lizing oluvchining) topshirig’iga ko’ra uchinchi tarafdan (sotuvchidan) 
lizing shartnomasi bo’yicha shartlashilgan mol-mulkni oladi va uni ushbu 
moddaning birinchi qismida belgilangan talablariga muvofiq bo’lgan shartnoma 
bo’yicha egalik qilish va foydalanish uchun lizing oluvchiga haq evaziga beradi.
Ushbu Kodeks maqsadlari uchun moliyaviy ijara (lizing) shartnomasining 
tarafi bo’lgan ijarachiga (lizing oluvchiga) moliyaviy ijara lizing predmetining 
xaridori sifatida qaraladi.