O‘zbekiston Respublikasi va Evropa Ittifoqi

I. Hamkorlik sohalari
1. Siyosiy choralar
Har ikki tomon:
O‘zbekiston Respublikasining energetika sektorida mamlakatning barcha energetika resurslarini rivojlantirish uchun belgilangan o‘rta va uzoq muddatli milliy strategiyaga asoslangan holda har taraflama va og‘ishmas siyosatni rivojlantirish va amalga oshirishni davom ettirishda;
energetikaga bo‘lgan talabni boshqarish bo‘yicha har taraflama strategiyani, shu jumladan preferensiyalar, energetika tariflarining ochiq-oydinligi va tegishli ravishda institutsional islohotlarni rivojlantirish va amalga oshirishda;
energiyani tejash orqali energiya samaradorligi bo‘yicha choralarni kuchaytirishda va zamonaviy ekologik toza energetika texnologiyalarini qo‘llashda, shuningdek O‘zbekiston Respublikasining energiya samaradorligi va energiyani tejash masalalari bilan shug‘ullanuvchi tashkilotlarining salohiyati va ekspert tajribasini oshirishda;
tiklanuvchi energiya manbalarini, xususan quyosh va shamol energiyasini rivojlantirishga qaratilgan siyosat ishlab chiqishda;
ushbu maqsadlarga erishish uchun Evropa Ittifoqi va O‘zbekiston Respublikasining vakolatli davlat va texnik agentliklari o‘rtasidagi hamkorlikning tegishli mexanizmlari va tadbirlarini belgilashda hamkorlik qilish uchun intiladilar.
2. Infratuzilma
Har ikki tomon o‘zaro ahamiyatga ega bo‘lgan mavjud infratuzilmani modernizatsiyalashda va Evropa Ittifoqi yo‘nalishida tranzit uchun foydali bo‘lishi mumkin bo‘lgan O‘zbekiston Respublikasida Sharq — G‘arb o‘qida yangi energetika infratuzilmasini yaratishda hamkorlik qilishga intiladi.
Hamkorlik zarur bo‘lgan joyda, xususan quyidagilarni o‘z ichiga olishi mumkin:
a) infratuzilmani modernizatsiyalash bo‘yicha rejani ishlab chiqish maqsadida uglevodorodlarning mavjud tranziti va yetkazib berish tarmog‘ini baholash;
b) O‘zbekiston Respublikasiga gazning sizib chiqib ketishi va yondirilishini kamaytirishda ko‘maklashish;
v) O‘zbekiston Respublikasiga energetika uglevodorod infratuzilmasi sohasidagi aniq yangi loyihalarni amalga oshirishda ko‘maklashish;
g) modernizatsiyalash va amalga oshirish mumkin bo‘lgan kengaytirish doirasida elektr energiyasini ishlab chiqarish tizimlari va elektr tarmoqlari ehtiyojlarini baholash;
d) yevropalik sheriklarni, shu jumladan Evropa bank institutlarini jalb qilish vositasi bilan shunday investitsiyalarni amalga oshirishni qo‘llab-quvvatlash.