O`zbekiston respublikasi oliy va o`rta maxsus ta`lim vazirligi toshkent davlat texnika universiteti “Geologiya qidiruv” fаkultеti “Nеft va gazni qayta ishlash ob’ektlari” kаfеdrаsi «korroziyadan himoya qilish»

5.7. Кислород қутбсизланиши билан борадиган коррозия жараёнлари.
Катод реакцияси электролитда эриган кислород иштирокида борадиган металлардаги коррозия жараёнлари кислород қутбсизланиши билан борадиган коррозия дейилади.
Кислород қутбсизланиши билан борадиган коррозия энг кўп тарқалган коррозия жараёни ҳисобланади. Кислород қутбсизланиши билан борадиган коррозияланиш атмосферада жойлашган, сув ва тузли эритмалар билан контактда бўлган металларда юз беради. Дарё ёки денгизда сузувчи кемаларнинг сирт қопламалари, кимёвий заводлардаги совутиш тизимининг жиҳозлари, магистрал кувур ўтказгичлар, нефт ва нефт маҳсулотлари сақланадигани резервуарлар ва б. шулар жумласидандир. 5.4-жадвалда кислород электроди мувозанат потенциалининг муҳит рН га боғлиқлик қийматлари келтирилган. Бу боғланиш кислород босимининг 0,1 МПа ва 0,021 МПа (О₂ нинг атмосферадаги парциал босими) қийматлари учун келтирилган.
5.4-жадвал
Кислород электроди мувозанат потенциалининг 25^оС ҳароратдаги муҳитнинг рН га боғлиқлик қийматлари

Кислороднинг босими РО2, МПа	рН нинг қуйидаги қийматларида Ер(О2/ОН–), В
	0	7	14
0,021	+1,218	+0,809	+0,381
0,1	+1,229	+0,815	+0,400

О₂ нинг қайтарилишидаги катод жараёни қуйидаги кетма-кет босқичларни ўз ичига олади:

• ҳаводаги кислороднинг электролитда эриши;
• электролит ҳажмида эриган кислороднинг металл сиртига ўтиши;
• кислороднинг ионлашуви;
• ОН^– ионларининг электролит ичкарисига масса олиб ўтиши;
Кўп ҳолларда катод жараёнининг энг секин босқичи тинч турган электролитларда кислород диффузияси, аралаштириладиган эритмаларда эса — кислород ионизацияси ҳисобланади.
Қутбланиш эгрилигининг E—i координаталаридаги кўриниши 5.6-расмда келтирилган. Графикнинг ABC қисми О₂ нинг қайтарилиш жараёнига тўғри келади. Боғланишнинг CKD = i_D қисми чегаравий диффузион токнинг қийматига мос келади. Биргаликда борадиган О₂ нинг ионизация жараёни ва
Н₂ нинг ажралиши KDF қисм орқали ифодаланган. Н₂ ажралишининг парциал эгрилиги расмда пунктир чизиқ билан белгиланган.