O‘zbekiston respublikasi oliy va o‘rta maxsus ta’lim vazirligi buxoro davlat univеrsitеti

Tursunboy Adashboyev
 
she’riyatida bolalik va tabiat munosabati ifodasi  
(1939-2017)
 
 

---

249 
 
 
 
        Tursunboy  Adashboev  1939-yilda  Qirg`izistonning  O`sh  viloyatiga  qarashli 
Olabuqa tumanidagi Safed Bulon qishlog`ida tug`ilgan. U bolaligidan  har ikki xalq 
tili, qadriyatlari, ma’naviyati, madaniyati, ma’rifatidan bahramand bo`lib  o`sadi va 
haqli  ravishda  o`zini  har  ikki  xalq  farzandi  deb  hisoblaydi.  Bo`lajak  shoir  qalbida 
she’riyatga  oshnolik  tuyg`usi  maktabda  o`qib  yurgan  vaqtidayoq  tug`iladi.  Uning 
"Maktabim"  sarlavhali  birinchi  she’ri  6-sinfda  o`qib  yurgan  paytida  "Lenin 
uchquni"  (hozirgi  "Tong  yulduzi")  gazetasida  e`lon  qilinganligi  fikrimizni 

---

250 
 
tasdiqlovchi  dastlabki  dalildir.  Ikkinchi  misol:  1956-yilda  "Qirg`iziston  haqiqati" 
gazetasi  eng  yaxshi  hajviy  she`rlar  uchun  tanlov  e’lon  qiladi.  Tanlov  yakunida  1-
mukofot  hech  kimga  berilmaydi,  2-mukofot  maktab  o`quvchisi  T.Adashboyevga 
beriladi.  Yana  bir  misol:  u  maktabda  o`qib  yurgan  paytida  "Qizil  O`zbekiston" 
gazetasida  folklorshunos  olim  H.Zarifov  nomidan  gazetxonlarga  murojaat  qilinib, 
ertakchi  bobo-buvilari  hamda  baxshilardan  o`zbek  xalq  og`zaki  ijodi  namunalarini 
yozib  olib,  tahririyatga  jo`natish  va  shu  bilan  xalq  og`zaki  ijodining  xalqimiz 
orasidagi nodir namunalarini saqlab qolishdek xayrli ishga hissa qo`shish tashabbusi 
bilan chiqilgan edi. Yosh o`quvchi T.Adashboyev qalbida bu tashabbus, ehtimolki, 
endi-endi  nish  urib  kelayotgan  badiiyatga  oshnolik  tuyg`ularini  uyg`otib  yuboradi. 
U  peshqo`rg`onlik  Olim  baxshi Soyibboyevdan  "Yozi  bilan  Zebo" dostonini  yozib 
olib,  Toshkentga  yuboradi  va  ko`p  o`tmay  folklorshunos  olimlar  H.Zarifov  va 
Muzayyana Alaviyadan yangi izlanishlarga undovchi minnatdorchilik maktubi ham 
oladi.  Baxshilardan,  bobo-buvilardan  eshitilgan  ertak  va  rivoyatlar,  doston-u 
qo`shiqlar,  tez  aytish-u  topishmoqlar  T.Adashboyev  qalbiga,  o`zi  aytganidek, 
"cho`g`  solgan  bo`lsa,  ajab  emas"  .  Shu  sababli  ham  u  o`rta  maktabni  tugatgach, 
Toshkent  davlat  universiteti  (hozirgi  O`zbekiston  Milliy  universiteti)ning 
jurnalistika  fakultetiga  hujjat  topshiradi.  Universitetda  o`qish  jarayonida  she’riyat 
sirlarini  yanada  puxta  egallagan  yosh  shoirning  dastlabki  asarlari  birin-ketin 
matbuotda  e’lon  qilina  boradi  hamda  talabalik  chog`idayoq,  1964-yilda, 
"Kamolning olmasi" deb nomlangan hammualliflikdagi birinchi kitobi nashr etiladi. 
T.Adashboyev  Toshkent  davlat  universitetini  tugatganidan  keyin  o`z  bilimini 
yanada  oshirish,  qalamini  charxlash  maqsadida  Moskvadagi  Jahon  adabiyot 
institutining ikki yillik kursida ham tahsil oladi. U o`qishni tugatganidan keyin uzoq 
yillar  mobaynida  O`sh  viloyat  gazetasida  adabiy  xodim  bo`lib  ishladi.  Shoirning 
1987-yildan  keyingi  taqdiri  Toshkent  bilan  bog`liq.  U  "Yulduzcha"  (hozirgi 
"Cho`lpon")  nashriyotida  salkam  yigirma  yil  bosh  muharrir  o`rinbosari  vazifasida 
ishladi.  Bu  davr  mobaynida  shoirning  "Biz  sayohatchilarmiz"  (1966),  "Ola-Tovlik 
bo`laman",  "Arslonbob  sharsharasi"  (1969),  "Surnay",  "Nur  daryo"  (1975), 
"Guldasta",  "Olatog`-lolatog`"  (1978),  "Jo`nataman  quyoshni"  (1982),  "Oqbura 
to`lqinlari" (1985), "Sovg`a" (1986), "Arslonbob afsonasi"(1988), "Uch bo`taloq va 
sirli qovoq" (1990), "Topishmoqli alifbe"(1997), "Oltin yolli tulpor qissasi" (2003), 
"Orzularim – qo`sh qanotim" (2003), "Osmondagi darvoza" (2012) singari kitoblari 
nashr qilinadi. 
T.Adashboyevning sermahsul va mohir tarjimon sifatidagi faoliyati ham o`ziga 
xosdir.  U  avvalo,  jahon  bolalar  she’riyatining  juda  ko`plab  yetakchi 
namoyandalarining  she’riy  asarlarini  o`zbek  tiliga  tarjima  qilib,  bolalar  adabiyoti 
xazinasini  boyitishga  hissa  qo`shadi.    Shoirning  "Men  suv  ichgan  chashmalar" 
turkumidagi  tarjimalari  ijodkor  iste’dodi  va  mahoratining  serqirraligini    asoslaydi. 
K.Chukovskiyning  "Eshitmadim  demanglar",  "Toshbaqa",  "Kular  tipratikanlar", 
"Jenni";  V.Berestovning  "Ko`lmakdagi  suratlar",  "O`qishni  bilsang  o`zing"; 
B.Zaxoderning  "Samovar",  "Bo`ri  maqtasa…",  "Itbaliq";  gurji  shoiri  Nodar 
Dumbadzening "Ketino", "Igna"; tatar shoiri N.Yusupovning "Kechirasiz", Rustam 
Ming`alimning  "Gilos",  "Shamol  esgach";  yahud  shoiri  Ovsey  Druzning 

---

251 
 
"Kutilmagan  hodisa",  "Tarozilar";    litva  shoiri  Y.Markinkyavichyusning  "Jang 
tugadi",  "Mening  kitobcham";  V.Dankoning  "Qorbobo  bo`lsam  agar",  "Hasrat"; 
tojik  shoiri Saydali Ma’murning  "Yaxshi odamlar", "Nima shirin?"; qirg`iz shoiri 
K.Junushevning  "Qayiq",  "Qaydan  bilsin?",  "Necha  so`mlik  bolasan?", 
"Toshbaqaning 
shiori", 
"Boshi 
bormi?"; 
qozoq  shoiri 
Q.Murzalievning 
"Xolmirzaning  "oti",  "Tikan  terdi";  turkman  shoiri  O.Annadurdiyevning  "Tovus", 
"Ninachi",  "Savol-javob";  polyak  shoiri  Yan  Bjexvaning  "Tuxum  va  tovuq",  "Tuz 
haqida ertak"; uyg`ur shoiri Uchqunning "Muhammadning savollari"; arman shoiri 
G.Gabrielyanning  "Misol",  "To`g`ri  javob",  "Vachikning  panjasi"; belorus  shoirasi 
N.Tulupovaning  "Dars",  "Nikitaning  yoshlari";  arab  shoiri  Bayon  as  Safadiyning 
"Rimaning  savollari",  "Shamol  ham  yig`laydimi?";  ingliz  shoiri  Uolter  De  La 
Merning "Pat saqlanar yostiqda", "Berkinmachoq" she`rlari; "Otboqar" nomli nemis 
xalq  ertagi,  makedoniya  xalq  she`riyatidan  "Teskari  hisob"  she’rlari  tarjimalari 
shular jumlasidandir. 
U  qirg`iz  adabiyotidan  30  ga  yaqin  asar  tarjima  qilgan.  Ular  orasida 
"Manas"ning  nasriy  bayoni,  "Singan  qilich"  romani  bor.  T.Adashboyev 
"O`zbekiston  xalq  maorifi  a’lochisi"(1993),  "Qirg`izistonda  xizmat  ko`rsatgan 
san’at arbobi" (1999), "Do`stlik" ordeni (1999), "Manas" ordeni (1995) sohibidir.  
T.Adashboyev  bola  ruhiyatini  yumorga  moyil  tarzda  nozik  ifodalaydi.  Uning 
kattalar uchun yozilgan asarida ham o`ziga xoslik sezilib turadi. T.Adashboyev o`zi 
tug`ilib  o`sgan  qardosh  Qirg`iziston  Respublikasi  O`sh  viloyati  tabiatini  shu  qadar 
mehr,  samimiyat  bilan  tasvirlaydiki,  ko`z  oldingizda  marjon-marjon  manzaralar  
xushbo`yini sochib tizilaveradi:   
 Asqar  tog`dan suv tushar 
Qoyalarda yanchilib. 
Deysan, nahot qarag`ay 
Ko`kda qolgan sanchilib. 
Kelar chanqoq bosgani 
Kiyik, qulon ohista, 
Arxar shohi ilinib 
To`kilar xandon pista. 
Qorli cho`qqi eslatar 
Qirg`iz og`am tumog`in. 
Tog` asalning hididan  
Bitib qolar dimog`ing. 
              ("Sarichelak") 
Bolalarda  bir  xususiyat  bor  –  o`yinga,  mashg`ulotga  shu  qadar  beriladiki, 
uning o`yinligini ham unutadilar. Yosh qalbda hali rost-u yolg`on, soxta-yu haqiqiy 
degan  tushunchalar  o`rtasida  aniq  chiziqlar  tortilmagan.  Ular  hamma  narsaga 
ishonadilar,  tabiiy  deb  qabul  qiladilar.  Hattoki,  o`zlari  o`yin  uchun  yaratgan 
narsalarni ham tirik mavjudot kabi yaxshi ko`rib qoladilar: 
Eh xayriyat, yomg`ir bu gal 
"Suvga oqib ketmasaydi 
Yo`lda qolgan rasmlar" deb, 

---

252 
 
Dilshod tunda uxlay olmay 
Tashvishlanib chiqdi hadeb, 
Suratlarni o`chiribdi 
Mashinalar, kaptarlarni 
Cho`chitmabdi, uchirmabdi. 
                                                           ("Asfaltdagi rasmlar") 
Taraqqiyot  sari  intilish  –  zamonlar  uchun  qonuniyat.  Lekin  taraqqiyot  munis 
o`t-o`lanlar  o`sgan  jaydari  yerlarni  bosib-yanchib  o`tmasligi,  bir-biriga  oqibatli 
mehnatkash chumolilarning uyini buzmasligi kerak. Fan-texnika nechog`li taraqqiy 
etmasin,  inson  bolasi,  o`zini  eng  avvalo,  ona-  tabiat  bag`rida  to`laqonli  his  etadi. 
Katta  zamonaviy  shaharlarda  tug`ilib  o`sgan  bolalar  qishloqqa  borib  qolsa,  mitti 
qo`ng`izcha  bilan  kun-tun  o`ynab  zerikmasligida  hikmat  ko`p.  T.Adashboyev 
she`rlarida bola qalbining quvonchi, hayratlari, beg`uborliklari ufurib turadi: 
Chaqmoq ko`kda yong`oq chaqdi, 
Qizg`aldoqlar selda oqdi, 
Quyosh yana kulib boqdi. 
T.  Adashboyev  she`rlarining  qahramonlari  "Loyni  bir  oz  tindirib  suv  zahrini 
sindirib"  g`isht  quyayotgan,  "Sapchib  oqqan  suv  bilan  kim  o`zarga  yugurgan", 
xolasiga  yordam  uchun  "...  nonni  botirib,  qotirib  qaymoq  yegan",  "Tog`dan 
ko`tarilgan quyoshni onasi yopgan patirga" o`xshatgan, buvisining ajinlariga qarab 
"Dazmol  bosib  olsangiz,  tekis  bo`lib  ketardi",  deb  maslahat  beradigan,  kun  bo`yi 
bog`dagi  sirpanchiqda  "vagon"  bo`lib  uchishgach,  "Oqshom  uyga...  Shimning  orti 
suzilib"  qaytadigan  quvnoq,  topqir,  xayolparast,  mehnatkash,  zavqi-yu  ishtahasi 
tobida bo`lgan bolalardir. 
Ayrim  she’rlardagi  voqelik,  tuyg`ular  kechinmasidan  shoir  bu  she’rni  o`z 
boshidan  kechirganlari  ta’siridanmi  yoki  kuzatganlari  asosida  yozganmi  –  bilinib 
turadi.  Lekin  T.Adashboyev  she’rlarida  bunday  chegara  yo`q  –  oddiy  chizgilardan 
salmoqli voqealargacha lirik qahramonning yuragidan o`tgan.  
Ag`darishmachoq soz o`yin, 
Polvonlar egmas bo`yin. 
Davrani keng olamiz. 
Chunki tengqur bolamiz. 
Shaylandim minib eshak, 
Akmal ham chiqdi beshak. 
Tushim ekan, xayriyat, 
Shoir  bolalar,  kattalar  tabiatining,  o`zligining  yarq  etgan  har  bir  qirrasini 
ko`rsatib  qo`yadigan  manzara,  voqea,  bahsning  suratini  so`zlarda  chizadi.  Shu 
orqali  o`quvchilarni  bag`ri  kenglikka,  mustaqil  mushohada  yuritishga  o`rgata 
boradi. 
Bolalar  arzimagan  bir  xasdan  ham  kashfiyot  qilishlari,  uni  langarcho`p  deb 
miriqib  o`ynashlari  mumkin.  Ba’zan  farzandlarimiz  ertak  qahramonlariga 
aylanadilar:  gullar  bilan  suhbatlashadilar,  xazonlarni  qayiq  qilib  sayohatga 
chiqadilar,  nima  uchun  qushlar  ularning  qo`liga  qo`nmayotganidan  ajablanadilar... 

---

253 
 
Dunyo bolalar adabiyotida kichkintoylarning shu kabi xislatlariga asoslangan ajoyib 
ertaklar bor. 
T.Adashboyev  ijodida  ixcham,  manzara  she’rlar  borki,  bolalar  uchun  filmlar 
yaratuvchi mohir rejissor ular asosida ajoyib asarlarni suratga olishi mumkin. Mana 
bu to`rt qator she’r  go`yo multfilmday. 
Boychechaklar nish urib 
To turguncha o`rnidan 
Bahor qishni tarnovga 
Osib qo`ydi burnidan. 
    Yoki, 
Tolning bargi suvga tushib 
Qayiq bo`ldi. 
Bu ayniqsa qumursqaga 
Loyiq bo`ldi. 
Qo`sh qirg`oqni to`lqin yalab 
Ko`kka sapchir, 
Eshkakni-chi, o`zi yakka 
Eshar abjir. 
Teng-tushlari qoldi gap-so`z 
Tayinlashmay. 
Qumursqa ham jo`nab ketdi 
Xayrlashmay... 
T.Adashboyevning  turli  davrlarni,  ya’ni  o`zining  bolalik  yillarini  eslatuvchi 
she’rlarini,  farzandlarining  bolaligini  tasvirlovchi  she’rlarini  –  barchasini  ichki  bir 
yaxlit  tuyg`u  –  mehr,  mehribonlik  birlashtirib  turadi.  Shoir  yaratgan  obrazlarning 
hayotiyligi bola tabiatiga yaqinligidadir. Uning "Do`ppi", "Kesib turdim", "Mayiz" 
nomli  she’rlari  quvnoq  yumor  bilan  sug`orilgan  bo`lib,  ularda  kichkintoylarning 
goh  sodda,  goh  beg`ubor,  goh  esa  ozgina  quv,  ayyor  xarakteri  ochib  beriladi. 
Aytaylik,  "Mayiz"  she’rining  qahramoni  –  Lola  ismli  jajji  qizcha.  U  mehmon 
tog`aning savollariga juda aqlli javob qaytaradi: 
– 
Oting nima, qizaloq? 
– 
Men-mi, tog`a, Lolaman. 
– 
Ol mayizdan bir hovuch, 
– 
Yo`q, odobli bolaman. 
   Hovuchingiz kattaroq, 
   Siz bersangiz olaman… 
She’rda bolalarning o`ziga xos topqirligi ham aks etib turibdi. Chunki, qizcha 
mayizdan o`zi olib  yesa odobsizlik ekanini biladi, mehmon tog`a olib bersa, uning 
qo`lini  qaytarib  bo`lmaydi-ku,  axir…  Mehmon  tog`aning  hovuchi  ancha  kattaligi 
esa ayni muddao. 
"Alam, alam" she’rida Lolaning teskarisi bo`lgan Saida ismli qizaloq xarakteri 
yaratiladi: 
–  Betoqat  qiz  Saida 
Sensan nafsing payida, 

---

254 
 
Turmaysan dasturxondan 
Uyalmaysan mehmondan. 
Uyat-uyat! 
 
–  O`zing anor  yeyolmay, 
Ozgina ber deyolmay, 
Ko`zing to`rt-ku bechora, 
Ololmasang ne chora, 
Alam-alam! 
T.Adashboyevning  juda  ko`p  she’rlarida  maktabgacha  tarbiya  yoshidagi 
bolalar  va  qizaloqlarning  turli  fe’l-atvori  quvnoq  va  samimiy  talqin  etiladi. 
Kichkintoy lirik qahramonlar goh o`z soddaligi tufayli kulgili holatga qoladi, gohida 
o`zlarini  dono  hisoblab,  kattalarga  gap  uqtiradilar:  tuflilari  eski  bo`lmasligi  uchun 
sandiqqa solib qo`yadilar, kiyishga qizg`anib, asrab yurgan tor kelgan shimni katta 
bo`lsam  kiyaman  deydilar,  do`ppisini  o`rtoqlari  koptok  qilib  tepganda  darvozabon 
bo`lgani  uchun  choki  so`tilganida  ham  o`zini  aybsiz  hisoblaydi,  yoki 
qo`g`irchoqlari  –  o`quvchilarining  hammasiga  qattiqqo`llik  bilan  ikki  qo`ygan 
"o`qituvchi" barcha beshni o`ziga qo`yadi va h.k. 
T.Adashboyev  umrining  oxirigacha  qalbi  bolalik  beg`uborligi,  samimiyati, 
soddaligi, yorqin hayrat-u quvnoq topqirliklari olamida sobit turdi. Binobarin, shoir 
ijodi  adabiyotshunoslikda  keng  o`rganilib,  alohida  tadqiqot  mavzuiga  ham  aylanib 
ulgurgan.  Jumladan,  B.Ashurov  o`z  ishida  shoir  ijodining  uch  asosiy  bosqichini 
ajratib ko`rsatadi: 
1.  XX  asrning  60-70-yillari.  Bu  davrda  u  xalq  og`zaki  ijodi,  jahon  bolalar 
adabiyoti  hamda  o`zbek  bolalar  adabiyoti  yetakchi  namoyandalarining  eng  yaxshi 
an`analarini o`zlashtirgan. 
2. XX asrning 80-yillari. Bu davrda T.Adashboyev o`zbek bolalar adabiyotida 
o`z  o`rniga,  o`z  so`ziga  ega  bo`lgan  shoir  sifatida  shakllandi,  ijtimoiy  dolzarb 
masalalarni bolalar she’riyatiga olib kirdi. 
3.  Istiqlol  davri.  Bu  davr  T.Adashboyev  ijodiy  kamolotiga  rivoj  qo`shdi.  U 
ona-Vatan,  kindik  qoni  to`kilgan  muqaddas  tuproq,  milliy,  tarixiy,  madaniy  va 
adabiy  qadriyatlarimiz  haqida to`lib-toshib  kuylovchi, yosh  avlodni  ularga sadoqat 
ruhida tarbiyalashga da’vat etuvchi sermahsul ijod bilan mashg`ul bo`ldi.  
Shoir  salkam  ellik  yillik  ijodi  davomida  ko`plab  ballada,  ertak  va  dostonlar 
yaratgan. "Ustaning baxti", "Dovonlar", "Burgutning o`limi", "Qismat" balladalari; 
"Sirli sharshara", "Nur daryo" dostonlari; "Adolatli qozi", "Oriyatli xo`roz", "Oltin 
yolli tulpor qissasi", "Roston xola - doston xola" ertaklari xalq og`zaki ijodi ta`sirida 
yozilgan. 
Uyg`ur  xalq  ertagi  asosida  qayta  yaratilgan  "Adolatli  qozi"  ertagi  sujetini 
jo`jalarga  qiron  keltirayotgan  Tulki  ustidan  tovuqlarning  qoziga  arz  qilishi  bilan 
bog`liq voqealar tashkil etadi. Majoziy usulda bitilgan ushbu ertakda birinchi qozi - 
Arslon. Tovuqlarning arz-dodini tinglagan qozi haqiqatni ayon qilish uchun Tulkini 
so`roqqa chaqirtiuradi: 
Paydo bo`ldi quv Tulki, 

---

255 
 
Yetmish yetti bukilib. 
Qo`ltig`ida paryostiq, 
Ta’zim qilar yukinib: 
– Davlatingiz bir umr, 
Bo`lsin bekam, ziyoda. 
Ayyor,  xushomadgo`y Tulki men tovuqning go`shtiga emas, patiga o`chman, 
chunki  men  yostiqdo`zman,  mana,  tovuq  patlaridan  sizga  atab  paryostiq  tikdim, 
deya  paryostiqni  Qozining  yonboshiga  suyaydi.  Sovg`a-salom  olgan  qozi  ishni 
tekshirtirishni orqaga tashlaydi. Natijada Tulki qutulib qoladi. 
Kun ortidan tun o`tib, 
Falak charxi aylandi. 
Bu orada Qashqir 
Qozi qilib saylandi. 
Tovuqlar  endi  bu  qozi  haqiqatni  ro`yobga  chiqarar,  jinoyatchining  jazosini 
berar degan umidda Qashqirga murojaat qiladilar. Tulki yana eski usulni qo`llaydi, 
bu  qoziga  ham  paryostiq  sovg`a  qilib,  qutulib  qoladi.  Ammo  uchinchi  marta 
Tayg`on qozi etib saylangan vaqtda tulkining hiylasi o`tmaydi. Shu sababli Qozi: 
- Bu makkorni hoziroq, 
Qirga quvib chiqinglar. 
Tulki zoti uchrasa, 
Tutib somon tiqinglar… 
deb farmon beradi. Shu tariqa, xalq ertaklaridagidek, yaxshilik murodiga yetadi. 
"Oltin  yolli  tulpor  qissasi"da  Olabuqa  qishlog`idan  o`n  chaqirim  naridagi 
Chotqol  tizma  tog`larining  etagida  joylashgan,  "chor  atrofni  archazorlar  kiprik 
misol  to`sgan"  Tulporko`l  afsonasi  qalamga  olinadi.  Bu  adabiy  ertakda  inson 
tabiatidagi  azaliy  ochko`zlik,  boriga  qanoat  qilmaslik  oqibatlari  xalq  ertaklariga 
monand  aks  etgan.  Adabiy  ertakdan  ma’lum  bo`lishicha,  Chotqol  tomondan 
baytalini  yeldirib,  ovuliga  qaytib  kelayotgan  cholning  ayni  peshin  chog`ida 
Tulporko`l  bo`yiga  yetib  kelishi  voqea  sujetiga  asos  bo`lgan.  Chol  issiqdan 
tolganligi  sababli  ko`lning  yam-yashil  qirg`og`i  yaqinida  bir  pas  dam  olmoqchi, 
qolaversa,  peshin  namozini  o`qish  niyatida  otdan  tushadi.  U  namoz  o`qish  bilan 
mashg`ul  bo`lgan  vaqtda  esa  ko`lning  o`rtasidan  oltin  yolli  tulpor  chiqib,  "ko`kka 
sapchib pishqirib, ko`zi yonib, shaylanib", bo`z baytal atrofidan uch marta aylanadi. 
Cho`pon esa beg`am, befarq, 
Ibodatin buzmasdan- 
Turib boqsa duldul ayg`ir 
Sho`ng`idi ko`l qatiga. 
…Oradan o`n ikki oy o`tib, cholning baytali oltin yolli qulun tug`adi. Ammo 
mol-dunyoga hirs qo`ygan kampir yana bitta shunday qulunli bo`lish dardida qaysar 
cholni  aldab-avrab,  Tulporko`lga  qayta  borishga  ko`ndiradi.  Chol  baytalni  minib, 
ko`l tomonga yo`l oladi, oltin yolli toychoq ham onasining ketidan qolmay, ularga 
ergashadi. Chol yana avji peshin chog`ida ko`l bo`yiga yetib keladi va: 
                Yozdi shoshib chakmonin 
Olib-olmay tahorat. 

---

256 
 
Chol shunchaki, nomi uchun 
Namoz o`qib o`tirar. 
Oltin yolli ot tashvishi 
Yuragini o`pirar. 
Shunga  yarasha,  ko`ldan  chiqqan  tulpor  toychoqning  bo`ynidan  tishlab,  o`zi 
bilan ko`l ostiga olib ketadi. Chol esa barmog`ini tishlab qolaveradi. 
Bu adabiy ertakda ham xalq og`zaki ijodi va A.S.Pushkin ertaklariga o`xshash 
insonning  ochko`zligi,  qanoatsizligi  tufayli  boridan  ham  ajrab  qolishi,  mahrum 
bo`lishi haqqoniy ochib berilgan. 
Xullas,  T.Adashboyevning  ertak  va  she’rlarida  zamondosh  o`quvchiga 
ma’naviy-ma’rifiy  oziq  bera  oladgigan  qahramonlar,  obrazlar  hamda  detallar  juda 
ko`p.