O‘zbekiston respublikasi oliy va o‘rta maxsus ta’lim vazirligi buxoro davlat universitetining pedagogika instituti

6-mavzu. Globallashuv va milliy ma’naviy muammolar.
REJA:

1. 
   XXI asrda jahon taraqqiyotining o’ziga xos xususiyatlari.O’zbekiston Respublikasida xalqaro xavfsizlik muammolari.
   
2. 
   O’zbekiston Respublikasi Prezidenti SH.M.Mirziyoyevning xalqaro va mintaqaviy xavfsizlikni mustahkamlashdagi tashabbuslari
   
3. 
   Markaziy Osiyo mintaqasidagi giyosiyosiy vaziyat va xavfsizlik masalalari. Odam savdosi. Terrorizm va ekstremizm.Ommaviy madaniyat. Mafkuraviy tahdidlar.
   
4. 
   Korrupsiya va jinoyatchilikning paydo bo’lishining sabablari hamda salbiy jihatlari. Korrupsiyaning davlat konstitutsiyaviy asoslariga zidligi.
   

Globallashuv hodisasi. Hozirgi davr haqida aniqroq tasavvur hosil qilish uchun XX asr boshigacha jahon tarixi asosan mustaqil rivojlangan va bir-biriga jiddiy ta’sir ko‘rsatmagan sivilizatsiyalardan iborat bo‘lganini nazarda tutish muhimdir. Hozirgi zamonda dunyo so‘nggi yuz yillik ichida yuz bergan jamiyat hayoti barcha jabhalarining faol integratsiyalashuvi natijasida sezilarli darajada o‘zgardi va yaxlit bir butun organizmga aylandi. Buning oqibati o‘laroq, ayrim xalqlar va butun insoniyatning ijtimoiy ongida global jarayonlar va ularning ta’sirida yuzaga kelgan umumiy (dunyo miqyosidagi) muammolar bilan belgilangan jiddiy o‘zgarishlar yuz bera boshladi. Jahon hamjamiyati o‘z rivojlanishining yangi bosqichiga qadam qo‘ygani, u avvalgi bosqichlardan nafaqat o‘zgarishlar miqyosi, balki faollik darajasi va universal xususiyati bilan ham farq qilishi ayon bo‘ldi.
Bu o‘zgarishlarning butun majmui, shuningdek ularning sabablari 1990-yillarda globallashuv (lot. globus – yer kurrasi) deb nomlandi. Globallashuv jamiyat hayotining turli jabhalarida butun yer sayyorasi uchun yagona bo‘lgan tuzilmalar, aloqalar va munosabatlarning shakllanishi, universallashuv jarayonidir. Shuningdek globallashuv global makonning tutashligi, yagona jahon xo‘jaligi, umumiy ekologik o‘zaro aloqadorlik, global kommunikatsiyalar va shu kabilar bilan tavsiflanadi.