Видеоконференцалоқа режимида ўтказиладиган суд мажлисини аудио ва видео қайд этиш ВКА режимида ўтказиладиган суд мажлисини аудио ва видео қайд этиш зарурати туғилган тақдирда, суд мажлисини ўтказиш тартиби мазкур Низом ва Ўзбекистон Республикаси Олий хўжалик суди Раёсатининг 2014 йил 21 августдаги Р№83-сонли қарори билан тасдиқланган “Видеоконференцалоқа режимидаги хўжалик судининг мажлисини ўтказишни ташкил этиш тартиби тўғрисида”ги Вақтинчалик низом талаблари асосида амалга оширилади.
ВКА режимида ўтказиладиган суд мажлисини аудио ва видео қайд этиш ушбу ишни кўраётган суд томонидан амалга оширилади.
ВКА режими орқали суд мажлисини аудио ва видео қайд этиш тўғрисида илтимоснома ВКА режимида суд мажлисини ўтказишга кўмаклашадиган судда иштирок этаётган тараф томонидан судга тақдим этилган тақдирда, у ахборот тизими орқали АКТ ходими томонидан ишни кўраётган суднинг электрон почтасига юборилади.
Ишни кўриш якунлангандан сўнг суд мажлиси котиби аудио
ва видео қайд этишни тўхтатади.
Суд мажлисининг қисқа баённомаси судлар электрон маълумотлар базасида сақланади.
Суд мажлисида аудио ва видео қайд этиш комплекси қўлланилганлиги тўғрисидаги ахборот иш муқовасида иш бўйича маълумотлар қоғозида кўрсатилади.
Суд мажлиси баённомаси ҳамда овозли ёзуви ва видеотасвири суд ҳужжати қабул қилинган кундан бошлаб маълумотларни сақлаш серверида ҳамда файлларни сақлаш техник воситаларига (диск, хотира қурилмалари) кўчирган ҳолда муҳрланган конвертга солиниб, иш материаллари билан биргаликда доимий сақланади.
Техник жиҳатдан суд мажлисининг овозли ёзуви ва видеотасвирини доимий сақлаш имконияти мавжуд бўлмаган тақдирда, бундай маълумотлар
3 йилдан кам бўлмаган муддатда сақланади
Суд мажлисини аудио ва видео қайд этиш, ишда иштирок этувчи шахсларнинг илтимосномаси ёки бевосита раислик қилувчи, ишлар хайъат таркибида кўрилаётганда судлов ҳайъатининг ташаббуси билан амалга оширилади.
Суд мажлисини аудио ва видео қайд этиш тўғрисида судга тақдим этилган илтимоснома раислик қилувчи (ишлар ҳайъат таркибида кўрилаётганда судлов ҳайъати) томонидан ўз жойида ҳал этилиб, бу ҳақдаги ажрим суд мажлиси баённомасига ёзиб қўйилади.
Суд мажлисини аудио ва видео қайд этиш ҳақидаги масала суд мажлиси очилганда ҳал этилиши лозим. Суд мажлиси бошлангандан сўнг ишда иштирок этувчи шахсларнинг илтимосномаси ёки суднинг ташаббуси билан суд мажлисини аудио ва видео қайд этишга йўл қўйилмайди.
Суд мажлисини аудио ва видео қайд этиш суд ходими томонидан техник йўриқномага мувофиқ амалга оширилади.
Суд мажлисида аудио ва видео қайд этиш амалга оширилганда суд мажлиси котиби томонидан юритиладиган баённомага (қисқа баённома жиноят ишлари бўйича судлар учун 4-6-иловалар, фуқаролик ишлари бўйича судлар учун 7-9-иловалар, маъмурий судлар учун 10-12-иловалар, иқтисодий судлар учун 13-15-иловалар) фақатгина:
суд мажлиси ўтказилган йил, ой, сана ва жой;
ишни кўраётган суднинг номи, суд таркиби ва суд мажлисининг котиби;
ишнинг номи ва рақами;
ишда иштирок этувчи шахслар ва суд процессининг бошқа иштирокчилари келган ёки келмаганлиги тўғрисидаги ҳамда келмаганлик сабаблари тўғрисидаги маълумотлар;
суд томонидан алоҳида хонага (маслаҳатхонага) кирмасдан жойида чиқарилган ажримлар;
ишда иштирок этувчи шахсларнинг оғзаки арзлари ва илтимосномалари;
ишни кўришда судга тақдим этилган барча ёзма ва ашёвий далиллар, экспертларнинг ёзма хулосалари ҳақидаги маълумотлар;
ишда иштирок этувчи шахслар (судланувчи, жабрланувчи, аризачи, даъвогар, жавобгар, гувоҳ, эксперт, мутахассис, таржимон, учинчи шахс ва бошқалар) берган тушунтириш ва кўрсатувларнинг бошланган ҳамда тугаган вақти;
суд музокараларининг мазмуни (жиноят ишлари бўйича судларда судланувчининг охирги сўзи) киритилади;
суд мажлисини ёзиб олишнинг техник воситаларидан фойдаланилганлиги тўғрисида белги қўйилади.
Суд мажлиси ВКА режимида ўтказилган тақдирда, суд мажлиси баённомасида:
суд мажлиси ВКА режимида ўтказилганлиги тўғрисидаги;
суд мажлисини ВКА режимида ўтказишга кўмаклашган суднинг номи ҳақидаги;
ишда иштирок этувчи шахслар ҳамда суд мажлисини ВКА режимида ўтказишга кўмаклашган, ишни кўраётган судга келган суд процессининг бошқа иштирокчилари тўғрисидаги;
суд мажлисини ВКА режимида ўтказишга кўмаклашган суднинг ҳамда ишни кўраётган суднинг АКТ ходимлари ҳақидаги маълумотлар ҳам киритилади.
Қисқа баённома электрон шаклда юритилади ва ишни кўриш якунлангандан кейин уч кундан кечиктирмасдан раислик қилувчи ва суд мажлиси котиби томонидан электрон рақамли имзо билан имзоланади ва ишга дахлдор бошқа ҳужжатлар билан бирга мазкур ишнинг электрон карточкасига бириктирилади. Агар иш жилди қоғоз шаклида юритилган бўлса, қисқа баённома раислик қилувчи ва суд мажлиси котиби томонидан имзоланиб, қоғоз шаклидаги иш жилдига бириктирилади.
Суд мажлисини аудио ва видео қайд этиш тўхтовсиз амалга оширилади. Суд мажлисида танаффус эълон қилинганда ҳамда суд маслаҳатда қолганда суд мажлисини аудио ва видео қайд этиш тўхтатилади.
Бунда суд мажлисида суд тарафларнинг илтимоси ёки ўз ташаббусига кўра ушбу ҳаракатни баённомага киритиш билан суд мажлисини аудио ва видео қайд этишни тўхтатиш ҳуқуқига эга.
Суд мажлисини аудио ва видео қайд этиш суд мажлисида танаффус эълон қилинганлиги сабабли тўхтатилган ҳолларда, аудио ва видео қайд этиш ишни кўриш давом эттирилган пайтдан бошлаб давом эттирилади. Суд маслаҳатда қолганлиги сабабли суд мажлиси тўхтатилган холларда, суд маслаҳатдан чиққандан сўнг давом эттирилади.
Суд мажлисини аудио ва видео қайд этиш жараёни техник бузилишлар сабабли узилган ёки тўхтатилган ҳолларда юз берган носозликлар, уларнинг сабаблари ва давомийлиги ҳақида далолатнома АКТ ходими томонидан тузилади. Далолатнома суд мажлиси котиби
ва АКТ ходими томонидан имзоланади ҳамда аудио ва видео қайд этиш жараёнида юз берган носозликлар бартараф этилгунига қадар суд ишни кўришни бошқа кунга қолдириши ёки танаффус эълон қилиши лозим.
Техник бузилишлар муддати ишни кўриш муддатига таъсир қиладиган тақдирда ёки суд ишни кўришни бошқа кунга қолдириши ёҳуд танаффус эълон қилиши тарафларнинг ҳуқуқ ва манфаатларига зид деб ҳисоблаган ҳолларда ишни кўриш умумий тартибда давом этади ва бу ҳақда суд мажлиси баённомасига маълумот киритилади
