O’tkir Hoshimov daftar hoshiyasidagi bitiklar

 

Jinoyat 

O’z  ko’nglidagi  mehrni  o’ldirish  odam  o’ldirishdan  og’irroq  jinoyatdir.  Negaki  har  qanday 

razillik bemehrlikdan boshlanadi. 

 

Boy va kambag’al 

Boy gerdaysa-salobat. Kambag’al ta’zim qilsa-xushomad. 

Boy gapirsa-donolik. Kambag’al sukut saqlasa-nodonlik. 

Boy “Mersedes” olsa-kamtarlik. Kambag’al velosiped olsa-manmanlik. 

Boy jinoyat qilsa-“sho’xlik”. Kambag’al sho’xlik qilsa-jinoyat. 

Boy o’lsa-motam. Kambag’al o’lsa-“bandalik”... 

 

Amalparast 

Echkidek  amalga  mingan  edi,  fil  ustida  o’tirgandek  bosar-tusarini  bilmay  qoldi.  Amaldan 

tushganida fildan yiqilganidek suyaklari sochilib ketmasa deb qo’rqaman! 

 

Mahalliychilik 

Mahalliychilik-millatchilikning  nikohsiz  tug’ilgan  bolasi,  shovinizmning  nikohsiz  tug’ilgan 

nevarasidir!