O’simliklarning tinim holat

O’SIMLIKLARNING TINIM HOLAT

O’sishning davriyligi, faol va sekin o’sish, tinim davrlar, majburiy va fiziologik tinim, muddatlari, boshqarish usullari, harakatlar, tropizmlar, geotropizm, fototropizm, gidrotropizm, xemotropizm, niktinastik, nutasiya harakatlari.

Yuksak o’simliklarning o’sish jarayoni ma’lum davriylik xususiyatiga ega. Eng faol o’sish, sekin o’sish va tinim davrlari ritmik ravishda navbatlashib turadi. Bunday ritmik davriylik yil fasllarining almashib turishi bilan bog’liq. Faqat doim nam va havo harorati kam o’zgaradigan tropik yerlarda o’simliklar butun yil davomida to’xtovsiz o’sa oladi. Fasllar asosida iqlim sharoiti o’zgaradigan barcha yerlarda o’simliklar, kuzdan boshlab, asosan qishda o’sishdan to’xtaydi, barglarni to’kadi, hatto yosh novdalaridan ham ajraladi, ya’ni tinim holatiga o’tadi. Tinim holatida barcha hayotiy jarayonlar to’la to’xtamaydi balki faol modda almashinuv jarayoni juda sekinlashadi. Tinim holatiga o’tgan daraxtlar, butalar, ko’p yillik o’tlar, tuganaklar, ildizpoyalar, urug’lar va umuman tirik hujayralarga ega bo’lgan o’simlik organlari va butun o’simlikda nafas olish to’xtamaydi. Faqat nafas olish jadalligi juda past bo’ladi.
O’simliklardagi ikki xil tinimlik yaxshi o’rganilgan: 1) majburiy tinimlik; 2) fiziologik tinimlik.
Majburiy tinimlikning asosiy sababchisi tashqi sharoit omillaridir. Ya’ni o’sish uchun zarur sharoitning yo’qligi sababli o’simlik tinimlik holatiga o’tishga majbur bo’ladi. Majburiy tinimlik davriyligi ayniqsa daraxtlar, mevali daraxtlarda va ko’p yillik o’simliklarda har yili takrorlanib turadi. Bu o’simliklarda tashqi o’zgarishlardan tashqari, ichki zapas moddalarning ximik o’zgarishlari ham yuz beradi. Kuzda va qish boshlarida daraxtlarning novdalari va kurtaklarida to’plangan kraxmal zapaslari asta-sekin shakarga aylanadi. To’qimalarda suvning miqdori ham kamayadi. Buning natijasida ularning sovuqqa chidamliligi oshadi. Bahorga kelib, buning aksicha o’zgarishlar bo’ladi va faol o’sish boshlanadi.