O‘quvchilarda shakllangan fanga oid kompetensiya elementlari: Adabiy-nutqiy kompetensiyalar

b) Frontal (guruh bilan ishlash)

III. Yangi mavzu:

Biz G‘afur G‘ulom hayoti to‘g‘risida gapirganimizda uning ota-onadan yosh yetim qolgani, hayotning juda ko‘p og‘irliklarini boshidan kechirganini aytdik. Tushunasizki, ijodkor odam xotirasi uchun bu kunlar izsiz ketishi mumkin emas edi. Uning qator asarlari, jumladan, «Sen yetim emassan» she’ri, «Shum bola» va «Netay» qissalarida ayni o‘sha kunlar asorati yaqqol sezilib turadi. Siz bu asarlar bilan yuqori sinflarda batafsil tanishasiz.

«Mening o‘g‘rigina bolam» hikoyasiga kelsak, u bejizga «voqeiy hikoya» deb nomlanmagan. Chunki hikoyaga yozuvchi bolaligida guvoh bo‘lgan hayotiy hodisa asos qilib olingan bo‘lib, u avtobiografik xarakterga ega.

Aslida biror odamning uyiga o‘g‘ri tushishi favqulodda hodisa hisoblanadi. Lekin, guvohi bo‘lganingizdek, bu hikoyada yetimlar hovlisiga o‘g‘ri oralashi sokin tarzda, kundalik voqeadek bayon qilinadi. Nega shunday, degan savol o‘z-o‘zidan tug‘iladi, to‘g‘rimi? Bu savolga javobni esa asar hodisalari yuz bergan zamon tabiatidan izlash kerak.

Xo‘sh, o‘sha paytda — 1917-yilning sentabr oylarida yurtni kimlar boshqarayotgandi, odamlarning taqdiri kimlarning qo‘lida edi? Nega bu boshqaruvchilar xalqni bu qadar og‘ir hayotga giriftor qildilar?

1865-yilda Qo‘qon xonligining taslim bo‘lishi bilan Turkiston o‘lkasi Rossiya imperiyasining mustamlakasiga aylanib qoldi. O‘lkani Rossiyadan kelgan, «general-gubernator» deb ataluvchi harbiy kimsalar idora qilar, ular o‘zlariga quloq soladigan odamlarni mingboshi, ellikboshi sifatida joylarga boshliq etib tayinlardilar. Turkistonni faqat xomashyo o‘lkasi sifatida ushlab turishni mo‘ljallagan imperiya rahbariyati bu yerda sanoat rivojlanishini, qishloq xo‘jaligi mahsulotlari qayta ishlanadigan korxonalar qurilishini mutlaqo xohlamas edi. Ilm-fan, ta’lim o‘choqlari zamondan orqada qolgan, ularni rivojlantirish uchun jon kuydirib harakat qilinmasdi. G‘afur G‘ulomning o‘zi o‘qigan rus-tuzem maktablari ham, aslida, mustamlakachilar chizgan chiziqdan chiqmay-digan ish yurituvchilarni tayyorlash maqsadida ochilgan edi. Tug‘ilish darajasi katta bo‘lgan Turkiston o‘lkasida ishsizlik kuchayib borar, xalqning peshana teri evaziga yaratilgan boyliklar huzurini esa boshqalar ko‘rardi.

Agar «Mening o‘g‘rigina bolam» hikoyasiga shu sharoitdan kelib chiqib yondoshsak, bilamizki, o‘g‘irlik bu o‘lkada oddiy hodisaga aylanib ulgurgan edi. Yurt tepasida turganlarning har kuni qilayotgan o‘g‘riligi oldida, bir kambag‘al oilaga boshqa bir nochorning o‘g‘ri sifatida tushishi favqulodda hodisa bo‘lmay qolgandi.

Mana shunday og‘ir sharoit yetmagandek, 1914-yilda Birinchi jahon urushi boshlangan. Unda har jihatdan ojiz Rossiyaning ham ishtirok etishi — «o‘lganning ustiga chiqib tepgan bo‘ldi» desak, aslo mubolag‘a bo‘lmaydi.