O‘quv dasturi (XI sinf) tadbirkorlik asoslari toshkent – 2018 tushuntirish xati

Tadbirkorlik asoslari fanini o‘qitishning vazifalari:

o‘quvchilarda kundalik faoliyatda qo‘llash, fanlarni o‘rganish va ta'lim olishni davom ettirish uchun zarur bo‘lgan iqtisodiy bilimlarni shakllantirish;

tabiiy-moddiy resurslardan oqilona foydalanish va asrab-avaylash, ongli ravishda kasb tanlashga yo‘naltirish;

o‘quvchilarda iqtisodiy jihatdan faol hayot tarziga, o‘z shaxsiy biznesiga ega bo‘lish, jamiyat taraqqiyotiga bevosita hissa qo‘shish kabi maqsadlar uchun amaliy zamin yaratuvchi iqtisodiy bilimlarni shakllantirish;

ularni yangi biznes-g‘oyalarni yaratish orqali tabiiy-moddiy resurslardan yanada samarali va oqilona foydalanishga yo‘naltirishdan iborat.

Umumiy o‘rta ta’lim muassasalarida o‘quvchilarning soliqlar va soliq to‘lovlari to‘g‘risidagi bilimlarini kengaytirish maqsadida I-IV sinflarda “Iqtisod va soliq alifbosi” kursining o‘quv materiallari Ona tili, O‘qish, Odobnoma, Matematika, Atrofimizdagi olam fanlari tarkibida, sinflar kesimida 10 soatdan;

V-VII sinflarda “Iqtisod va soliq saboqlari” o‘quv kursi Tarix, Matematika, Fizika, Geografiya, Vatan tuyg‘usi fanlari tarkibida sinflar kesimida 17 soat hajmida singdiriladi; VIII-IX sinflarda iqtisodiy bilim asoslari fani haftasiga 1 soatdan o‘qitiladi. XI sinfda tadbirkorlik asoslari 1 soatdan o‘qitiladi.

Iqtisodiy bilim asoslari va Tadbirkorlik asoslari fanlari ta’limning uzluksizligi, uzviyligi, o‘quvchi shaxsi va qiziqishlari ustuvorligidan kelib chiqib, ularning yosh xususiyatlariga mos ravishda tayanch kompetensiyalar elementlari shakllantiriladi.