Oni karimdan ayrim suralar fotiha surasi haqida

Муаввизатайннинг нозил бўлиш сабаби 
Аҳсам номли бир яҳудий Расулуллоҳ соллаллоҳу алайҳи васалламни сеҳрлагани 
сабабли бу икки сура нозил бўлган. Оиша онамиздан қилинган ривоятда, Расулуллоҳ 
соллаллоҳу алайҳи васалламни тароқ ва каноп тивити билан хурмо гулининг эркак 
уруғ куртаги қобиғи ичига солиб, уни қудуқ остига ташлаб, сеҳрлашди. Унда ўн битта 
тугунча бўлиб, игна билан тикилган эди. Бас, шунда мана шу икки муаввизатайн 
суралари нозил бўлди. Расулуллоҳ соллаллоҳу алайҳи васаллам ҳар гал бу сураларни 
ўқиганларида ундан битта тугунча ечилар эди. Ҳар ечилганда Расулуллоҳ соллаллоҳу 
алайҳи васаллам ўзларида енгиллик ҳис қилардилар. Шу тарзда давом этиб, ҳаттоки 
охирги тугунча ҳам ечилди. У Зот ўринларидан турганларида, ўзларини гўёки 
кишандан халос бўлгандек ҳис қилдилар. 
Жаброил алайҳиссалом Расулуллоҳ соллаллоҳу алайҳи васаллам ҳузурларига келиб, 
қуйидаги калималар билан дам солдилар. 
«Бисмиллаҳи урқийка мин кулли шай ин ю зийка мин шарри ҳасидин ва ҳайнин 
валлоҳу яшфийка» 

---

(Маъноси: Аллоҳнинг исми ила дам соламан. Ҳар бир азият берувчи нарсадан, ҳар бир 
ҳасадчи ва кўзнинг ёмонидан Аллоҳ сизга шифо берсин. 
Имом Термизийнинг Абу Саид ал-Худрийдан (розияллоҳу анҳу) қилган ривоятларида 
айтилишича, Расулуллоҳ соллаллоҳу алайҳи васаллам (икки «Қул аъузу…» сураси 
тушишидан олдин) жин ва инсонларнинг кўзи тегишидан паноҳ сўраб юрардилар. 
Қачонки, шу икки паноҳ сўралувчи Фалақ ва Нос суралари нозил бўлганда, бу 
икковини ушлаб, бошқа (паноҳ сўралувчи дуо)ларни тарк қилдилар. 
Имом Моликнинг Оишадан (розияллоҳу анҳо) қилган ривоятларида эса бундай 
дейилади: «Расулуллоҳ соллаллоҳу алайҳи васаллам агар бирор касалликка 
чалинсалар, икки «Қул аъузу…» сурасини ўқиб ўзларига дам солардилар. Бордию 
касаллари оғирлашиб кетадиган бўлса, мен бу икки сурани ўқиб баракали бўлгани 
учун ўз қўлларини ўзларига суртар эдим». 
Бу суранинг аввалги оятларида жамики махлуқотлардан паноҳ сўраш умумий қилиб 
гапирилган бўлса, кейингиларида эса хослаб, ёмонликлари улкан бўлгани учун улардан 
огоҳлантирилиб уч тоифа зикр этилмоқда. Улар зулматга чўмган кечанинг ёмонлиги, 
тугунларга дам солувчи (жодугар)лар ва ҳасад қилувчи ҳасадгўйлардир.