Қон босимини пасайтирувчи воситалар

МИОТРОП ТАЪСИРЛИ ПРЕПАРАТЛАР (МИОТРОП ВОСИТАЛАР)
а) Ион каналларига таъсир қилувчи воситалар
А. L-турдаги кальций каналларини блокловчи воситалар (кальций антагонистлари). Бу гуруҳ вакилларидан нифедипин ва дилтиаземлар тўғрисида олдинги маърузаларда тўхталганмиз.
Фелодипин (плендил) – дигидропиридинлар гуруҳига кирувчи препа-рат бўлиб, асосан томирлардаги кальций каналларини блоклайди. Ичилганда биоэришувчанлиги 15-20%, 99%дан ортиғи қон зардобидаги оқсиллар билан бирикади. Жигарда кучли метаболитланади ва метаболитлари буйраклар ор-қали ажратилади. Фенигидиндан фарқли равишда таъсири давомли, t_1/2=11-16 соат. Шунинг учун кунига 1 маҳал ичишга тавсия қилинади. Артериал гипертензияда ва стенокардияда қўлланилади. Ножўя таъсирлари: бош айланиши, чарчоқлик, баъзан тери тошмалари.
Лацидипин (мотенс) – ҳам дигидропиридинлар гуруҳига кирувчи препарат бўлиб, асосан томирлар силлиқ мушакларидаги кальций каналларини блоклайди. АҚБни тушириши ҳисобига томирлар умумий периферик қарши-лигини пасайтиради. Юракка бевосита таъсир кўрсатмайди. Артериал гипертензияда кунига 1 маҳал ичилади. Ножўя таъсирлари: бош айланиши, бош оғриши, тахикардия, кўнгил айниши, оёқларнинг пастки қисмларида истисқо, тери тошмалари ва б.
Б. Калий каналларини фаоллаштирувчи воситалар
Қатор гипотензив воситаларнинг силлиқ мушаклар ҳужайралари мембраналаридаги калий каналларининг очилишига олиб келиши сабабли томирлар таранглигининг пасайиши юзага чиқади.
Миноксидил – ушбу гуруҳга кирувчи воситаларнинг ичиш учун мўлжалланган энг фаол препаратидир. У артериолаларни кенгайтиради, томирлар периферик қаршилигини пасайтиради ва АҚБни камайтиради. МИЙдан яхши сўрилади. Гипотензив самараси 24 соатгача сақланиб туради. Асосан жигарда метаболитланади ва буйраклар орқали ажратилади. Ножўя таъсири: гирсутизм (юзни эркакларникига ўхшаб жун босиши). Ренин ажралиб чиқишини ошириши туфайли организмда натрий ионлари ва сувнинг тўпланиб қолиши, шишлар пайдо қилиши мумкин.