Олий ўқув юртларида ўқув жараёнини кредит-модуль тизимида ташкил қилиш

4.4. Деканат ва ўқув бўлими ҳужжатлари

Таъкидлаб ўтилганидек, кредит-модуль тизими шароитида деканат ва ўқув бўлимларининг диққати фақат таълимни юқори сифатли режалаштиришга, ўқув жараёнини ташкил қилишга ва таълим самарасининг мониторингига қаратилган. Қуйида кредит-модуль тизими шароити учун тавсия қилинадиган ҳужжат намуналари келтирилган:

• 
  кафедра ўқув юкламаси;
  
• 
  педагогик юклама топшириғи;
  
• 
  дарс жадваллари;
  
• 
  ўқитувчининг дарс жадвали;
  
• 
  талабанинг шахсий дарс жадвали;
  
• 
  академик гуруҳ журнали;
  
• 
  ўқитувчининг шахсий иш режаси;
  
• 
  профессор-ўқитувчиларнинг дарсларига ташриф варағи.
  

Педагогик юклама соатлари ҳисоби

Ишчи ўқув режалари, педагогик юкламалар учун вақт меъёрлари ва талабалар контингентидан келиб чиқиб кафедра профессор-ўқитувчиларининг умумий педагогик юкламаси аниқланади. Ҳисоблар соат ва кредитларда кўрсатилади ва ўқув ишлари проректори томонидан тасдиқланади. Кафедра ўқув юкламаси шакли иловада 7-шаклда келтирилган.

Педагогик юклама топшириғи

Кафедра мудири кафедра ўқув юкламаси ҳажмидан, лекторлар ва тьюторлар учун белгиланган педагогик юклама меъёрлари ва семестрлар бўйича бир тақсимланишидан келиб чиққан ҳолда кафедранинг штатлар бирлигини аниқлайди. Барча ҳисоб ишлари академик соат ва кредитларда амалга оширилади. Педагогик юклама топшириғини ўқув ишлари проректори тасдиқлайди ва дарс жадвалларини тузиш учун деканатга тақдим қилинади. Педагогик юклама топшириғи намунаси иловада 8-шаклда келтирилган.

Дарс жадваллари

Дарс жадваллари диспетчерлик хизматлари томонидан уч хил шаклда тайёрланади: умумий, ўқитувчи учун ва талаба учун. Умумий дарс жадвали ўқув ишлари проректори томонидан тасдиқланади ва ўқув семестри бошланишидан камида 10 кун олдин эълон қилинади.
Дарслар жадвали шакли иловада 9-шаклда келтирилган.
Профессор-ўқитувчиларга семестр учун ҳафта кунлари, дарс ўтиш саналари кўрсатилган дарслар жадвалининг шахсий варақаси берилади. Дарс жадвали варақаси 2 нусхада тайёрланади, биринчиси – тьюторга берилади, иккинчиси – ўқув назорати ва режалаштириш бўлимида қолдирилади.
Ўқитувчининг дарс жадвали шакли иловада 10-шаклда келтирилган. Ҳар бир талабага шахсий дарс жадвали тақдим этилади. Талабанинг шахсий дарс жадвали шакли иловада 11-шаклда келтирилган.