Олабўжи романдан катта хикоя

Наби кулди. 
– Ундай буйруқ бўлмаган. 
Ултон ерга тушиб, кўйлаги орқасини текисларкан, Наби ҳам 
тушди-да, ойнабанд эшик оғзида – мармар зинапояда қўлларини 
орқасига қилиб турган оқ-ёзги кийимдаги милисага: 
– Қалайсан, носкаш?— деди. 
Милиса хўмрайди. 
– Кўчада қолдирсангиз ҳам бўларди. 
– Бу – кўчада қолмайдиган мошина! Ҳе, кўр бўл. 
Ултон вилоят марказида – газетада ишлаётганида бу маҳкамага 
икки марта кирган эди. Тўғри, Тўқлибой Қўчқоровга эмас, мафкура 
бўлим котибасига учрашиб қайтганди. У редакциянинг мошинасида 
келган, ўшанда бу эшик оғзида милиса турганмиди-йўқми – эсида йўқ. 
Зинапояга етишганда, милиса Ултонга чест бериб: 
– Ҳужжат? – деди. 
Наби анграйиб қолди-да: 
– Ҳужжат – бу одамнинг ўзи-ку! – деб дўқ қилди. – 
Танимаяпсанми? 
– Таниб турибман, – деди лунжида туршак бордек ғўлдираб. – 

---

12 
Лекин тартиб шу, Наби ака. 
– Ҳе, тартибинг бошингдан қолсин! Бор, телефон қил! Тўқлибой 
Қўчқоровнинг ўзидан сўра! 
Ултоннинг хўрлиги келиб, ортига ўгирилди. Шаҳар пастда, иморат 
баландда эди: гўё бутун ноҳия кафтдагидек кўриниб турсин учун бу 
кошона қир ён бағрида қурилган эди. 
Дарвоқе, бунинг боғчаси ҳам антиқа: аксар дарахтлар – жануб 
меҳмонлари: қарағайлар, пальма, кипарис. Боғ тевараги туя деган яшил 
бута билан ўралган. 
– “Бу жой – алоҳида мамлакат!” деб ўйлади Ултон. Ва ўзга район 
фирқа маҳкамаларию уларнинг-да боғчалари ҳам шундай – истисно 
эканини эслаб, анча хотиржам тортди. Энди сигарет чекмоқчи 
бўлаётганди, ичкаридан бояги милиса чиқди. Хижолатомуз илжайди: 
– Марҳамат, домла.