"Нонсиз 10 кун" марафонида қатнашмоқчи бўлганлар сони ўйлаганимдан кўп бўлди, хурсандаман!

"Нонсиз 10 кун" марафонида қатнашмоқчи бўлганлар сони ўйлаганимдан кўп бўлди, хурсандаман!
Марафон шартлари жуда оддий ва шу билан бирга сиздан сабр, қатъиятлилик, ирода ва сўзингиз устидан чиқиш талаб қилинади. Ўзингизга қуйидаги шартларни 10 кун давомида албатта бажараман деб сўз беришингиз керак!
10 кун давомида бажариладиган шартлар қуйидагича:
1. Кун давомида ва қандай овқат бўлишидан (суюқ ва қуюқ) қатъий назар нон емаслик.
2. Оқ ундан тайёрланган ҳар қандай хамирли овқатларни (макарон, лапша, сомса, манти, лағмон ва бошқалар) ҳар доимги порцияни тенг ярмидан ортиғини емаслик. Айтайлик, 6 та манти эмас 3 та, бир коса лағмон эмас ярим коса ва шу тартибда бошқалари ҳам.
3. Оқ ундан тайёрланган торт, булочка, печенье, қўйингки барча пишириқлар таъқиқланади.
Қисқаси, ҳеч нарса ўзгармайди, фақат рационинингиздан нонни ва пишириқларни чиқариб ташлайсиз ҳамда хамирли таомларни 2 баробарга қисқартирасиз!
"Ўзимни шунча қийнаб, эвазига нима оламан?" деган саволга кейинроқ кафолатланган фойдалари ҳақида батафсил маълумот бераман.
Эрталаб, оч қоринга тана вазнингизни ўлчаб, бирор жойга ёзиб қўйинг, 10 кундан кейин сўровнома ўтказамиз ва шартларга амал қилдингизми йўқми аниқлаймиз.
Бу марафондан кўзланган мақсад фақат озиш эмас, юқорида айтганимдек кейинроқ, батафсил маълумот бераман.
10 кундан сўнг барча шартларга амал қилиб, ўз сўзини устидан чиққанлар учун навбатдаги БЕПУЛ марафонда қатнашиш осон бўлади.