Николай андреевич римский–корсаков (1844-1908)

НИКОЛАЙ АНДРЕЕВИЧ РИМСКИЙ–КОРСАКОВ
(1844-1908)

Буюк компазитор, ўқитувчи ва жамоат арбоби Р. Корсаков ўзидан кейин катта ижодий мерос қолдирди. Унга 15 опера, 3 симфония, оркестр учун қатор асарлар, жумладан, “Шехерезада” симфоник сюитаси, “Испан каприччиоси”, ва булардан ташқари романслар ва бошқа асарлар киради.

Р. Корсаковнинг ижодий истеъдоди айниқса опера жанрида тўла намоён бўлди. Операларида компазитор рус халқ эртаклари ва афсоналаридан кенг фойдаланади.
Р. Корсаков 1844-йил Новгород губерниясининг Тихвин шахарчасида туғилади. Унинг мусиқий қобилияти эрта намоён булади. Лекин оилавий анъанага кўра уни 12 ёшида Петербургдаги Денгиз корпусига ўқишга беради. Шунга қарамасдан у мусиқа билан шуғулланишни давом эттиради.1861-йил эса бўлажак компазитор Балакирев билан танишади. Бу унинг ҳаётида бурилиш ясайди. Балакиревнинг раҳбарлигида у 1-симфониясини ёза бошлайди. Ўқишини тамомлагандан сўнг Р. Корсаков ҳизмат юзасидан 2 йиллик денгиз саёҳатига кетади. Ана шу денгиз саёҳатидан олган таассуротлари кейинчалик унинг асарларида ўз ифодасини топади.
1871-йил Р. Корсаковни Петербург консерваториясига профессор лавозимига ишга таклиф этишади ва у 40 йил давомида ушбу консерваторияда ўқитувчилик фаолиятини олиб боради.
Рус ҳалқ қўшиқларини диққат билан ўрганган компазитор 1878-йил (Гоголь асари асосида) “Май оқшоми”, 1881-йил “Қор қиз” операларини яратади.
1890-йиллардан бошлаб компазитор ижодида сермаҳсул йиллар бошланади. Бу вақтда у “Рождества арафасидаги оқшом” (1894), “Садко” (1895-1896), “Шох қайлиғи” (1898) операларини яратади.
ХХ аср арафасида у яна эртак операларига диққат эътиборини қаратди. 1899-йилда ёзилган “Шох Салтан ҳақида эртак”, 1902-йилда ёзилган “Ўлмас Кащей” ва 1907-йил яратилган “Олтин хўрозча” опералари шулар жумласидандир.
1900-йиллари компазитор асарлар яратиш билан биргаликда бошқа компазиторлар–Мусоргский, Бородин ва Даргомыжский асарларининг чала қолган жойларини тўлдириш, таҳлил қилиш каби ишлар билан ҳам шуғулланади. Р. Корсаков 1908-йил Петербург яқинидаги Любенск қишлоғида (усадьба) оламдан ўтади.