Нефть ва газни қайта ишлаш жараёнлари ва ускуналари Ўзбекистон Республикаси Олий ва ўрта махсус таълим вазирлиги олий ўқув юртлари бакалавриатининг «Нефть ва нефть-газни қайта ишлаш технологияси»

Аппарат (лот.) – асбоб, техник қурилма, мослама, ускуна. Дарсликда аппарат атамаси ўрнига ускуна сўзи ишлатилди.
Барботаж (франц.) – аралаштириш, суюқлик қатламидан газ ёки буғни босим билан ўтказиш.
Барботёр (франц.) – идишнинг ичига сув буғи ёки газ беришга мўлжалланган бўлиб, турли шаклга эга бўлган тешикли қувур.
Газодувка (рус.) – ҳаво ёки бошқа газларни сиқиш ва ҳайдаш учун ўртача босим (0,01 дан 0,3 МПа гача) ҳосил қиладиган гидравлик машина.
Газлифт (рус.) – суюқликларни уларга аралаштирилган газ энергияси ҳисобига кўтариш ускунаси. Агар ускунада газ ўрнига сиқилган ҳаво ишлатилса эрлифт деб аталади.
Гидрогенизация (лот.) – оддий ёки мураккаб кимёвий бирикмаларга, асосан, катализаторлар иштирокида водород бириктириш. Ушбу жараёндан юқори сифатли мотор ёнилғиси, қаттиқ парафинлар, спиртлар ва бошқа органик бирикмалар олиш учун фойдаланилади.
Гидрокрекинг (инг.) – таркибида олтингугурт ва смоласимон моддалар кўп бўлган нефтни 350-450⁰С да, водороднинг 3-14 МПа босими остида ва катализатор (алюмосиликат) лар таъсирида қайта ишлаш.
Гидроциклон (юнон.) – бир-биридан ўлчамлари билан фарк қиладиган қаттиқ заррачаларни сув муҳитида марказдан қочма куч таъсирида ажратишга мўлжалланган ускуна.
Горелка (рус.) – газсимон, суюқ ёки чангсимон ёнилғиларнинг ҳаво ёки кислород билан аралашмасини ҳосил қилиб, уни ёқиш жойига узатадиган мослама.
Градирня (нем.) – сувни атмосфера ҳавоси билан совитиш ускунаси.
Дегидратация (лот.) – кимёвий бирикмалардан сувни ажратиб олиш; гидратация реакциясига тескари реакция. Дегидратация жараёни нефтларни бирламчи тозалаш пайтида (яъни сувсизлантиришда) ишлатилади. Нефтни қайта ишлаш саноатида хом ашёни сувсизлантириш ва тузсилантириш учун электродегидраторлар ва электрокоалесцерлар ишлатилади.
Дегидрогенизация (лот.) – кимёвий бирикмалардан водородни ажратиб олиш реакцияси; гидрогенизацияга тескари реакция. Дегидрогенизация жараёни, масалан, бутан ва бутилендан бутадиен, парафин углеводородларидан ароматик углеводородлар, н-гександан бензин ишлаб чиқаришда қўлланилади.