Нефть ва газни қайта ишлаш жараёнлари ва ускуналари Ўзбекистон Республикаси Олий ва ўрта махсус таълим вазирлиги олий ўқув юртлари бакалавриатининг «Нефть ва нефть-газни қайта ишлаш технологияси»

12-БОБ. А Б С О Р Б Ц И Я

12.1. УМУМИЙ ТУШУНЧАЛАР

Газ ҳамда буғ-газ аралашмаларидаги бир ёки бир неча компонентларнинг суюқликда танлаб ютилиш жараёни абсорбция деб аталади. Ютилаётган газ абсорбтив, ютувчи суюқлик абсорбент дейилади. Абсорбтив билан абсорбентнинг ўзаро таъсирига кўра абсорбция жараёни икки хил бўлади: физик абсорбция ва кимёвий абсорб­ция (хемосорбция). Физик абсорбцияда ютилаётган газ билан абсорбент ўзаро бир-бири билан кимёвий бирикмайди. Агар ютилаётган газ абсорбент билан ўзаро бирикиб, кимёвий бирикма ҳосил қилса, хемосорбция дей­илади. Абсорбция жараёнида газнинг ютилмай қолган қисми инерт газ деб аталади.
Физик абсорбция кўпинча қайтар жараёндир, яъни суюқликка ютилган газни ажратиб олиш мумкин бўлади, бундай жараён десорбция дейилади. Абсорбция билан десорбция жараёнларини узлуксиз олиб бориш натижасида ютилган газни тоза ҳолда ажратиб олиш ва ютувчи абсорбентни бир неча марта қайта ишлатиш имкони пайдо бўлади. Одатда абсорбтив ва абсорбент арзон ва иккиламчи маҳсулот бўлгани учун, улар абсорбция жараёнидан кейин кўпинча қайта ишлатилмайди.
Саноатда абсорбция жараёни турли мақсадларда қўлланилади: 1) газ аралашмаларидан қимматбаҳо компонентларни ажратиб олишда; 2) газ аралашмаларини заҳарли моддалардан тозалаш учун; 3) газларни қуритиш; 4) тайёр маҳсулотлар олишда ва ҳоказо.
Ҳар бир аниқ шароит учун тегишли абсорбент танлаб олинади; бунда ютилиши лозим бўлган компонентнинг абсорбентдаги эрувчанлиги ҳисобга олинади. Тажриба йўли билан аниқланганки, абсорбция жараёнида ҳар доим иссиқликнинг ажралиб чиқиши юз беради. Газларнинг суюқ абсорбентлардаги эрувчанлиги қуйидаги омиллардан боғлиқ бўлади: 1) газ ва суюқ фазаларнинг физикавий ва кимёвий хоссалари; 2) ҳарорат; 3) газнинг аралашмадаги босими.
Абсорбентларни танлашда қуйидаги омилларга аҳамият берилади: ажратилиши лозим бўлган газнинг таркиби; жараённинг босими ва ҳарорати; ускунанинг иш унумдорлиги; абсорбентнинг танлаб таъсир қилувчанлиги ва унинг ютиш қобилияти, коррозияга учрашиш фаоллиги, нархи, заҳарлик даражаси ва ҳоказо.
Нефть ва газ саноатида абсорбция жараёни углеводородли газларни ажратиш, қуритиш ва тозалашда ишлатилади. Табиий ва йўлдош газлардан абсорбция усули билан этан, пропан, бутан ва бензин компонентлари ажратиб олинади. Абсорбция ёрдамида табиий газларни нордон компонентлар (олтингугурт водороди, олтингугурт углероди, углерод диоксиди, меркаптанлар ва ҳоказо) дан тозаланади. Абсорбция ёрдамида пиролиз ва каталитик крекинг газлари ажратилади ва газлар зарарли қўшимчалардан тозаланади.
Углеводородли газларни ажратишда абсорбент сифатида бензин ёки керосин фракциялари ҳамда газ конденсати ишлатилади; бундай газларни қуритишда эса диэтиленгликоль ва триэтиленгликолдан фойдаланилади. Газларни нордон компонентлардан тозалаш учун N-метил-2-пирролидон, гликоллар, пропиленкарбонат, трибутилфосфат, метанол ишлатилади.
Абсорбция жараёнини ўтказишга мўлжалланган ускуналарни абсорберлар деб юритилади.