Навоий давлат кончилик институти корхона жиҳозлари

6.36. Ион алмаштириш ускуналари

Ўз ионларини эритма таркибидаги ионларга алмаштириш қобилиятига эга бўлган сорбентлар, яъни ионитлар билан электролит эритмаларининг ўзаро таъсирлашуви ва эритма таркибидаги зарарли ионларни чиқариб олишда кенг қўлланилади.

Ион алмаштириш оддий адсорбцион жараёнлардан шуниси билан фарқ қиладики, бу жараён (ион алмаштириш) одатда ионит билан эритма таркибидаги кимёвий бирликлар ўртасида гетероген реакциялар билан бирга боради.
Ион алмаштириш ускуналари ва схемаси физик адсорбцияникидан фарқ қилмайди. Бу жараён ҳам тўрт босқичда боради: 1) эритма таркибидаги ионларнинг ионитга ютилиши; 2) ионитни хом ашё эритмадан ювиб тозалаш; 3)ионитни регенарация қилиш; 4) ионитни регенерацияловчи эритмадан ювиб тозалаш.
Ион алмаштириш ускуналари даврий ёки узлуксиз ишлаши мумкин. Даврий ишлайдиганларига қўзгалмас ионит қатлами ва мавҳум қайновчи ионит қатлами, узлуксиз ишлайдиганларига ҳаракатланадиган ионит қатлами, узлуксиз ишлайдиганларига ҳаракатланадиган ионит қатлами ва кўп босқичли мавҳум қайнаш қатлали ускуналар киради.
Даврий ишловчи қўзғалмас ионит қатлами ускуна (1.55-расм) пастида ва юқорида тақсимлаш қурилмалари ўрнатилган цилиндир идишдан иборат. Ёриқли қалпоқчалари бўлган пастки тақсимлаш қурилмасининг устига қўзғалмас ионит қатлами жойлашган.
Ускунанинг остки қисмидан кирган эритма тақсимлагич орқали ионит қатламига киради ва у ерда эритма таркибидаги бир ёки бир нечта компонент ионитга ютилади. Тозаланган эритма ускунанинг тепасидаги бўшлиқда тўпланади ва чиқиб кетади. Ион алмаштириш жараёни тугагандан сўнг ускунага эритмани киритиш тўхтатилиб ионит регенерация қилинади. Дастлаб ионит сув билан ювилиб эритмадан тозаланади. Бунда сув ҳам ускунада пастдан баландга ҳаракат қилади. Ювиш тугатилгандан кейин ионитга регенерацияловчи эритма билан ишлов берилади ва бунда, ион алмаштириш жараёнида ионитга ютилган модда регенерацияловчи эритмага ўтади. Кейин ионитни сув билан ювиб регенерацияловчи эритмадан тозаланади. Шу билан ион алмаштиришнинг бир цикли тугайди.
Ион алмштириш ускуналари адсорберлар билан деярли бир хил бўлганлиги учун уларнинг қолган конструкциялри ҳақида тўхталмаймиз.