Наманган давлат университети педагогика факультети

Хроматин (тигроид) модда. Ниссл усулида бўялган препаратдаги нерв ҳужайралари протоплазмасида яҳши бўялган майда-майда доначаларнинг уюмлари кўзга ташланади. Булар хроматин ёки тигроид модда (Ниссл доначалари ёки субстанцияси) деб аталади. Бу доначалар асосан ҳужайранинг танасида ва унинг дендритларида жойлашган; нейритнинг ҳужайрадан чиқувчи қисмида эса доначалар бўлмайди.
Электрон ва фазо контраст микроскоп ёрдамида хроматин модданинг ҳар бир уюми мураккаб тузилишга эга эканлиги аниқланади. Хроматин модда нозик эндоплазматик тўр­дан тузилган бўлиб, бу тўрнинг атрофида ўзаро анастомоз ҳосил қилувчи паралел най­ча­лар ёки юпқа пуфакчалар жойлашган. Ана шу пуфакчалар орасида диаметри 10-30 А га бўлган доначалар тўплами бор. Электрон микроскоп ёрдамида ўтказилган текширувлар шуни кўрсатадики, хроматин модда ёнма-ён турган иккита пластинкадан иборат бўлиб, уларнинг устида доначалар ётади. Кимёвий жиҳатдан хроматин модда асосан нуклеопро­теиддан тузилган. Нерв ҳужайрасининг протоплазмасида нуклеопротеидлар билан қў­шил­ган ҳолатда, яъни липопротеид ҳолатида бўлади.
Нерв ҳужайра протоплазмасидан нейрит ажралиб чиқадиган жойда хроматин модда бўлмайди. Лекин протоплазманинг бу жойи кислотали фосфатазанинг энг фаоллашган жо­йи ҳисобланади. Бу ерда нейритнинг нормал ишлаши учун зарур бўлган рибонуклео­про­теидларнинг парчаланиш жараёни жадал боради.
Ҳужайра чарчаган, қўзғалган ва наркоз берилган пайтда хроматин модда камаяди ёки йўқолиб кетади. Бу доначалар организм чарчаганда йўқолиб, дам олганда яна пайдо бў­ла­ди. Шунга кўра улар ҳужайранинг энергетик моддаси бўлса керак, деб тахмин қилинади.
Баъзи касалликларда тигроид модда доначалари йўқолиб кетади. Буни тигролиз ёки хроматолиз дейилади.
Митохондрий. Нерв ҳужайраси протоплазмасининг нейрит ажраладиган қисмида ҳар хил ҳажмдаги оқсиллардан иборат митохондирий деб аталувчи донача ва таёқчалар жойлашган. Улар асосан липоидлардан тузилган парда билан ўралган. Митохондрийларда ҳар хил ферментлар, жумладан углевод, оқсил, мой ва энергетик модда алмашинувида иш­тирок этувчи ферментлар борлиги аниқланган. Ҳозирги вақтда митохондри нерв им­пул­ьс­ларини аксонларга йўналтиришда ва миянинг энг мураккаб функцияларидан бири бўлган ҳотирада иштирок этса керак, деб тахмин қилинмоқда.