Namangan davlat universiteti kimyo kafedrasi kimyo texnologiya

KIMYOVIY TEXNOLOGIYA LABORATORIYASIDA ISHNI TASHKIL

ETISH VA UMUMIY QOIDALAR.

Kimyoviy texnologiya laboratoriyasi noorganik va organik mahsulotlarni olish bilan bog’liq bo’lgan amaliy ishlarni bajarishga mo’ljallangan. Ishning nazariy asoslari ma’ruza kursida beriladi. Laboratoriya ishlarini bajarishda turli-tuman reaksion, elektroqizdirgichli, kontrol o’lchov apparatlari va priborlari bilan ishlashga to’g’ri keladi. Shuning uchun bunday laboratoriyada alohida elektroxavfsizlik choralarini ko’rish talab etiladi.

Ushbu ko’rsatmada berilayotgan ishlarni asosiy qismi sanoat miqyosida boradigan jarayonlarni laboratoriya darajasida modellashtiradi. Shuning uchun bu ishlarni bajarish yuqori nazariy bilim va qurilmaning texnologik sxemasiga kiradigan qator apparat va priborlar bilan amaliy ishlash qobiliyatini hamda, hisob-kitobning asosiy tamoyillarini bilishni talab etadi.

Talaba kollokvium topshirishdan avval, umumnazariy tayyorgarlikdan tashqari yana ishning bajarilish tartibi va undagi qurilmalarni mukammal o’rganmog’i shart. Ish daftariga tajribani borishi yoziladi vа qurilma sxemasi chiziladi. Tajriba natijalari jadval shaklida ifodalanadi. Kollokvium topshirgan va ishni bajarish uchun dastlabki ma’lumotlarni olgan talaba, laborantning xavfsizlik texnikasi bo’yicha bergan savollariga javob qaytargandan so’ng ishni bajarishga ruxsat oladi. Ishni bajarish davomida olingan barcha natijalarni talaba ishchi daftariga yozishi shart. Ishni bajarib bo’lgandan va ish joyini tartibga keltirgandan so’ng talaba o’zining ishchi daftariga laborantga imzo chektiradi.

Bajarilgan tajriba natijalari har bir ish uchun olingan moddalar yoki ma’lumotlarning sifat va miqdoriy nuqtai nazaridan qo’yilgan talablariga javob berishi kerak. Faqat shu qoldagina ishni bajarilgan deb hisoblanadi va o’qituvchi tomonidan imzo chekiladi.