N. Hakimov, E. Abdullayev, F. Halimov, A. Xamidova umurtqasizlar zoologiyasidan amaliy mashg’ulotlar

Ishni bajarish
1-ish. Tirik volvokslar va boshqa kolonial fitomonadalar ko’paytirilgan suvli namunalardan tomizgich bilan biroz olib buyum oynasiga tomiziladi hamda usti mum yoki plastilin oyoqchali qoplag’ich oyna bilan yopiladi. Mikroskopning kichik obyektivida kolonial fitomonadalar (gonium, evdorina, pandorina va volvoks) topiladi va ularning harakati kuzatiladi. Mikroskopda koloniya hujayralarining xivchinlari harakatini aniq ko’rish mumkin, lekin volvoks koloniyasi hujayralarini xivchinlari ancha nozik va tiniq hamda kaltaroq bo’lganligi sababli, harakatini ko’rish ancha qiyin. Ammo sharsimon koloniyaning yumalab harakatlanganini ko’rish mumkin. Shuningdek koloniya ichidagi yosh (qiz) koloniyalarni bo’lishiga e’tibor bering.

2-ish. Volvoksning tuzilishini ko’rish uchun suvli namunadan preparat tayyorlab, qoplag’ich ostidagi ortiqcha suv filtr qog’ozi bilan so’rib olinadi. Harakatdan to’xtagan koloniyani va uning tarkibidagi individlarni mikroskopning katta obyektivida kuzatish imkoni bo’ladi.

3-ish. Ko’rilgan kolonial fitomonadalar (gonium, evdorina, pandorina va volvoks) ning tuzilishi rasmlarini daftaringizga chizing va ifodalab qo’ying.