N. Hakimov, E. Abdullayev, F. Halimov, A. Xamidova umurtqasizlar zoologiyasidan amaliy mashg’ulotlar

Mashg’ulot maqsadi. Umurtqali hayvonlar va odamlarda parazitlik qiluvchi tripanosoma va leyshmaniyalarning tuzilishi va hayot sikli bilan tanishish.

Mashg’ulot uslubi. Tripanosoma va leyshmaniyalarning tuzilishi va rivojlanish xususiyatlarini rangli jadvallardan tushuntirish, mikropreparatlar namoyishi, talabalar bilimini baholash.

Kerakli jihozlar. Uslubiy qo’llanmalar, rangli jadvallar, MBI-1 mikroskoplari, tripanosoma va leyshmaniyaning tayyor mikropreparatlari, kedr yog’i, toluol yoki ksilol, salfetkalar, filtr qog’ozi.

O’rganiladigan xivchinlilarning sistematik o’rni
Tip Soxtaoyoq xivchinlilar- Sarcomastigophora

Sinf Xivchinlilar - Mastigophora

Kenja sinf Hayvonsimon xivchinlilar – Zoomastigina

Turkum Kinetoplastidalar – Kinetoplastida

Tur Tripanosoma – Trypanosoma rhodesiense

Tur Leyshmaniya – Leishmania tropica

Umumiy tushunchalar
Kinetoplastidalar turkumiga kiruvchi bir hujayralilarning xivchini bilan bog’liq maxsus organoidi – kinetoplast (blefaroplast)i bo’ladi. Ularning ayrim turlari erkin hayot kechirsa, ko’pchiligi parazit hisoblanadi. Parazit kinetoplastidalar orasida tripanosomalar va leyshmaniyalar amaliy jihatdan e’tiborga molik xivchinlilardir.