Murakkab sharoitlarda neft va gaz quduqlarini qazish

Quduq tubi dvigatellari bilan bog‘liq halokatlar. Hozirgi vaqtda burg‘ilash korxonalari kuchli shpindelli turbobur va quduq tubi vintli dvigatellardan foydalanmoqda. Ulardan eng ko‘p tarqalgani har xil diametrli 3TSSH va ASH turdagi turboburlar, D va D2 turdagi vintli dvigatellar hisoblanadi. Ular bilan quyidagi halokatlar sodir bo‘ladi: 3 TSSH va ASH turboburlar yuqori perevodnikining buralib ketishi, natijada shpindelning buralib qolishi; rezba zonasining yuqori perevodniki bo‘yicha turbobur korpusining sinishi; 3 TSSH turbobur o‘rta seksiyasi shpindelining bo‘shab qolishi; val shpindelining sinishi; turbobur yuqori perevodnik rezbasining uzilishi; turbobur valining sinishi; qulf rezbasi bo‘yicha shpindelning sinishi.

Turboburlarning korpusi, asosan, rezba bo‘yicha sinadi. Bir seksiyali turboburlarda sinish korpus bilan yuqori perevodnikning ulangan joyida, ko‘p seksiyali turboburlarda esa ulovchi perevodniklarda kuzatiladi. Turbobur vallari rotor tagi gaykasi va kontrgaykalarning yuqori rezbasi bo‘yicha sinadi. Natijada turbobur korpusi quduqdagi qattiq tog‘ jinslari bo‘laklari, metall predmetlar bilan ponalanadi. Turbobur bo‘g‘inlaridagi rezbalarning uzilishi va buralib bo‘shab qolishi ularni yig‘ish jarayonida yaxshi mustahkamlanmaganligidan va turboburlarni ishlatish va ta’mirlash qoidalarining buzilganligidan dalolat beradi.