Муниципалитет

МУНИЦИПАЛИТЕТ (немисча – «Munizipalitat», лотинча – «municipium». ўзини ўзи идора қилувчи жамоа) — бир қанча мамлакатларда маҳаллий бошқарув ва ўзини ўзи бошқарувчи сайлаб қўйиладиган органларнинг мажмуи. Айрим мамлакатларда шаҳар бошқарув органларигина Муниципалитет деб аталади. Москва шахрида маҳаллий ўзини ўзи бошқарувчи орган муниципал йиғилиш ва маҳаллий маъмурият бошлиғини ўз ичига олади. Муниципалитет тегишли маъмурий ҳудудий бирлик аҳолиси томонидан сайланади ва унга конституциявий ҳуқуқда халқ ҳуқуқий корпорациялари сифатида қаралади. Одатда, Муниципалитет мэр, бургомистр бошчилигидаги сайлаб қўйиладиган ижрочи мулозимлар девонидан иборат бўлади. Муниципалитет муниципал корхоналар, турар жой фонди ва бошка мулклар эгаси бўлиши мумкин. У давлат мактаблари, санитария хизмати идоралари, маҳаллий полиция, бир қанча мамлакатларда эса тиббий хизмат ва ижтимоий таъминот бўйича турли муассасаларни бошқаради. Муниципалитетнинг асосий даромад манбаи аҳолидан йиғиладиган маҳаллий соликлардир.