Mulla Mubinning falsafasi

Mulla Mubinning falsafasi

Nima desangiz ham, aziz zamondoshim, tilg`irom va fayzbog` ajoyib yaratmalar! Ajoyib foydalansangiz, ajiboti ochilaveradi. Dunyoning u chekkasi bilan bu chekkasini bog`lagandan keyin dunyo ajoyiboti shunda-da! Tili shirin tanishlaringni, unutilib ketganlarini ham so`ramasang-da “lo`p” etib chiqarib qo`yaveradi. Bir unutgan birodarlarimizdan maktub( sms xabar) kelibdi. Aytsam ishonmaysiz, bu kim deng? –Mulla Mubin! Sizam taniysiz uni. Dunyoga dong`i ketgan “faylasuf” Mulla Mubin. Qadrli ustozimiz bizga dorulfununning muborak ikkinchi bosqichida falsafadan ta`lim berganlar. “Domillo”ning butun semestr davomida hurmat-izzatllarini joyiga qo`ydik va u kishi ham yuqori hurmat ila biz “bedonalarga” dialekt, qarama-qarshiliklar, sifat o`zgarishlari kabi ancha-muncha nimarsalarni o`rgatganday bo`lgandilar. Imtihonlar yakunida, albatta, mehmonni kuzatganda ko`nglini xushlaganingizdek, Mulla Mubinni ham “minnatdor” qilib yuborganimiz ayon. Kaminadan sal behurmatlik o`tganmi yoinki to`rt qator mashqlarimiz bilan eslarida qolibmizmi saodatli kunlarning birida yod etibdirlar. Samimiy suhbatlarda suhbatdoshimning ilmidan amaliy foydalanish odatim bor. Shu kishi faylasufdirlar, hayotning ma`nosiga boshqacha nazar bilan qaraydirlar, deya dardi hol qilayin dedim. Ul kishining o`z dardi ochilib qoldi. Bu yog`ini qulog`ingizning paxtasini olib eshiting!

Mulla Mubin har daf`a dorulfununga kiraversalar hovlida oppoq to`p bulut paydo bo`larmush. “Ol, qulim” , deganday misqol-misqol etaklariga oltin to`karmush. Mulla Mubin hayratda :bul bandasiga xudoning bergani, deb olaverarmish. Hamkasblariga ham ilinib saxiy domillomiz kelasi daf`a bir yosh hamkasbining oilasiga yordam bo`lar, har holda toza ro`zg`or, deya Mulla Lazizjon bilan dorulfunun hovlisiga birga kirmishlar. Bu yog`i ne bo`ldi deb o`ylaysiz? Mulla Laziz etak-etak oltinni ko`z oldiga keltirib bir ishonib, anovi “Jinlar bazmi”dagiday bir lagan go`ng misoli bir etak axlatni xiyol qilib bir ishonmay , birida yurib, birida yurmay borar emish. Ko`rsinki , kelsa etak-etak oltin berur bulut u yonda tursin, bir etak go`ngdan ham chorak soat o`tmishki darak yo`qmish. Bulutni esa Sulaymonning shamoli uchurib ketgani tayin. Mulla Mubin hayratda emas , hasratda “o`lay agar” deb bir hovuch oltin ko`rsatarmush. Mulla Laziz soxta dermish. Qonot siltab darsxonasiga jo'namish, tinch o'tirolmasmish. So'ng shu kundan Mulla Mubinning iziga tushmish, bildirmay, yashirib, orqama-orqa bormish. Ne ko'z bila ko'rsinki, Mulla Mubinning cho'ntagidan o'lik og'ziga paxtada suv tomizmishday dona-dona oltinlar tushib borarmish. Mulla terib borarmish, har holda ovqatni ko'rmasa-da , yuntisidan uning ta'mini his qilmish kabi 3-4 tillolik bo'libdur. Shu iz bosishlikni har kun kasb qilmish. Endi bu yog'ini Mulla Mubindan eshiting! Mullo : "Bu o`lmagur Lazizning bir gapi bo`lmasin tag`in deya takror-takror yak o`zi kelmish. Qarasaki atrofda kimarsa yo`q, bulut pag`a bo`lib turibdir. Oltinlarni Fayloqusning Doroga yubormish tilla tuxumlariday etakka sochmish. Tekin osh kimga yoqmas! Bulutdan tunovgi ginani unutib Mulla Mubin shod darsga jo`namish. Dars esa doimgiday “hurmat-izzat”da kechmish. Mulla Mubin o`zini tilla hadya qiluvchi bulut musaxxar bo`lmishday tutar. Biroq faylasufmasmi bir yaxshining har yomonini ham o`ylab mag`zini chaqmaydimi? Nega shunday zamonda faqat unga bu tilsim?! O`ylay-o`ylay aqldan ozay deganda tong oqararmish. Ertasi yana shu hol. Tentaknamo bo`lib, qasrlar solib, “Molibu”larni qo`sha olib, shugun tillo kerakmas desa, o`rgangan devona ko`ngul: “Hali evaralaringning kelajagini ham o`ylasang, ol,ol”, - dermish. Oxirini kutyapsizmi?

Oxiri telbaday bo`lib Mulla Mubin bu kechmishni menga yozmish. Men bechora o`zida yo`q aqlni o`rgatmish: “Qo`ying , domillo, voz keching, bilmassizki buni oxiri ne bo`lur va yana bir nimarslar…?” Mulla Mubin jahli chiqur:”Nechun hayotni lazzatidan bebahra qolarman, Xudo bergani-da, sen devonamisan”?

–Xo`sh unda yuravering , ne qilursiz arzu hol qilib? Tolibi ilmlarga hadya qiling, duosini oling.

• 
  Ey befarosat, qo`lingda turganni sochib ne qilursan, erta bu bulut bormu yo`qmu yoki men o`lsamchi, hayotdan zavqlanib yashamoqni o`rganishing kerak sen bola hali!
  

To`g`risi, men bu voqeadan na muammo topdim, na chora. Mulla Mubinga esa nachora! Ammo aynan Mulla Mubinning dorulfununida saxiy bulutlar bor ekan, hayotdan zavqlanib yashash mumkinligini anglab yetdim. Siz-chi, siz bu yozganlarimdan nimani angladingiz ? Angladingizmi o`zi?