Muhammadaziz: yodlasam bo‘lmasmidi?

Muhammadaziz:

YODLASAM BO‘LMASMIDI?

Kavsar Turdiyeva

Shu kichkina she’rchani

Yodlasam bo‘lmasmidi?

Hozirgidek yuragim

Po‘killab urmas edi.

O, qani endi nogahon

O‘ngidan kelsa tushim.

Xuddi tushimdagidek

Birdan yo‘qotsam hushim.

Jimgina najot kutib

Yotardim «Tez yordam»dan.

She’rni kim ham so‘rardi

Kasal yotgan odamdan.

Yoki o‘qituvchimiz

Bizga rahm qilsalar.

Vazifani topshirib,

Uyga javob bersalar.

Xayolimni qo‘ng‘iroq

Chil-chil qilib tashladi.

O‘qituvchi kiriboq,

She’rni so‘ray boshladi.