Moliya” fanidan Joriy Nazorat savollariga javoblar

Kuzatuv (monitoring) bu xo’jalik yurituvchi sub’yektlar faoliyatidagi mavjud o’zgarishlarni aniqlash uchun doimiy ravishda olib boriladigan nazorat ishlarining tizimidir. Masalan, kredit tashkilotlari tomonidan berilgan kreditlardan foydalanish va qarz oluvchining moliyaviy holati doimiy ravishda kuzatiladi. Qabul qilingan kreditlarning samarasiz ishlatilishi va to’lov qobiliyatining pastligi kreditlarning yanada yomonlashuviga va kreditni muddatidan ilgari qaytarish talabiga olib kelishi mumkin.

Taftish moliyaviy nazoratning keng tarqalgan usuli bo’lib, korxona, tashkilot va muassasalar moliya-xo’jalik faoliyatini o’zaro bog’langan kompleks tekshiruvidan iboratdir. Taftish moliya va soliq masalalari bo’yicha qonunchilikka rioya qilinishi, soliq, bojxona, boshqa organlarga, bankka va davlat statistika organlariga taqdim etiladigan hisob-kitob va hisobotlarning ishonchliligi ustidan nazoratni amalga oshirish maqsadida xo’jalik yurituvchi sub’yektlarning buxgalteriya va boshqa moliya-ishlab chiqarish hujjatlarini tekshirish uslubidir.

Ob’ektga qarab, to’liq, qisman, mavzuli va kompleks taftishlar mavjud. Ular rejalashtirilgan va rejadan tashqari ham bo’lishi mumkin.

Taftish jarayonida axborotni qamrab olish darajasiga qarab, barcha hujjatlar va moddiy qiymatlarni nazoratini qamrab oluvchi to’liq taftish hamda hujjatlarning bir qismini nazorat qilishni qamrab oluvchi qisman taftishlarga bo’linadi.

Tekshiruvlar o’tkaziladigan materialning xarakteri bo’yicha hujjatli (hisobot hujjatlarining haqiqiyligini va qayd etilgan hujjatlardagi yozuvlarni tekshirish) va haqiqiy (pul va moddiy boyliklarning mavjudligini tekshirish) taftishlarga bo’linadi.

Mavzuli taftish bir tipdagi korxona, tashkilot va muassasalarning faoliyati bo’yicha ma’lum bir mavzuga bag’ishlab o’tkaziladiki, bu narsa ularga xos bo’lgan tipik kamchiliklar va buzilmalarni aniqlash hamda ularni bartaraf etish bo’yicha tegishli choralarning qo’llanilishiga imkon beradi.

Kompleksli taftish tekshirilayotgan korxona, tashkilot va muassasa faoliyatining barcha tomonlarini qamrab oladigan va eng to’liq bo’lgan taftish bo’lib, u nazorat sub’yektining xo’jalik va moliya faoliyatini, moddiy, mehnat va moliyaviy resurslarning butligi va ulardan samarali foydalanish masalalari, buxgalteriya hisobi va hisobotining holati va sifati kabi masalalarni o’z ichiga oladi. Kompleksli taftish natijalarining to’liqligi va samaradorligini ta’minlashda muhim rol o’ynaydi.

Rejali taftish vakolatli organ tomonidan tasdiqlangan reja asosida o’tkazilsa, rejadan tashqari taftish qonun hujjatlarini buzilish holatlari aniqlangan, asosli shikoyatlar tushganda huquqni muhofaza qiluvchi organlar tashabusi bilan, shuningdek yuridik shaxs tugatilayotganda o’tkaziladi.

Taftishning har qanday turini o’tkazish uchun taftishning maqsadi, ob’yekti, mavzusi va asosiy masalalari ko’rsatilgan dastur tuziladi.

O‘tkzilgan taftish natijalari bo’yicha dalolatnoma tuziladi va uning asosida aniqlangan kamchiliklarni bartaraf etish uchun chora-tadbirlar ishlab chiqiladi. Shuningdek, aybdorlarni javobgarlikka tortish choralari belgilanadi.

5.