Mirsaid Aripov, Nurillo Otaxanov

 20-BOB. DASTURLASHNING STANDART TEXNOLOGIYALARI

Bu bobda dasturlashning Windows ilovalari uchun standart texnolo-giyalari ko`rib chiqiladi. Bu texnologiyalar yordamida ilovalar tugallangan ko`rinishini oladi va foydalanuvchi interfeysi qoidalariga mos keladi.

20.1. Drag-and-Drop ko`chirishining interfeysi

Komponentalarni olib o`tish va qabul qilish interfeysi ilovalarning bajarilishi jarayonida boshqaruvning ikki elementi o`rtasidagi aloqasini ta`minlaydi.

Mexanizm ishga tushishi uchun boshqaruvning ikki elementini talabga muvofiq ravishda sozlash talab qilinadi. Ularning biri manba (Source), ikkinchisi — qabul qiluvchi (Target) bo`ladi. Bunda manba hech yerga siljimaydi, faqat shunday mexanizm sifatida qayd etiladi halos. Bitta boshqaruv elementi bir vaqtda manba ham, qabul qiluvchi ham bo`lishi mumkin.

Foydalanuvchi sichqoncha ko`rsatkichini kerakli boshqaruv elementi ustiga keltirib, chap tugmasini bosadi va qo`yib yubormagan holda ko`rsatkichni ikkinchi element tomon olib boradi. Bu elementga etganidan so`ng, foydalanuvchi sichqoncha tugmasini qo`yib yuboradi. Shu vaqtda dasturchi nazarda tutgan amalning bajarilishi boshlanadi va birinchi element manba, ikkinchisi qabul qiluvchi vazifasini bajaradi.

Mexanizm sozlanganidan so`ng, ishga tushadi va sichqoncha yordamida manba-komponentani qabul qiluvchi tomon olib borish amaliga javob beradi. Bir guruh xodisalarni qayta ishlagichlar jarayonni to`la nazorat qiladi va dasturchi olib borishdan ko`zda tutgan xarakati bilan bog’liq kodlarni saqlaydi. Bu matnni uzatish, boshqaruv elementi joyini shunchaki o`zgartirish, hususiyatlarning qiymatlarini (bitta muharrirdan boshqasiga interfeys ko`rinishini, shrift va matnlarni) o`tkazish, fayl va tasvirlarni olib o`tish va boshqalar kabi amallar bo`lishi mumkin. Windows dagi Drag-and-Drop mexanizmiga namuna sifatida papka va disklar o`rtasida fayl va papkalarni ko`chirish imkoniyatini olish mumkin.