Microsoft Word Tursunboyev S. O'zbek teatri tarixi. Majmua

 
 

---

ABDURAUF FITRAT 
(1886—1938)
 
 
Abdurauf  Fitrat  Buxoro  shahrida  savdogar  Abdurahimboy  oilasida  tavallud  topgan. 
Buxorodagi  Mirarab  madrasasida,  so’ng  1909—1913-yillari  Istambul  dorilfununida  tahsil 
ko’rgan.  Keyinroq  Samarqandga  kelib  M. Behbudiy  bilan  hamkorlik  qiladi,  «Hurriyat» 
gazetasida  muharrir  bo’lib  ishlaydi.  1923—24-yillari  Fitrat  Moskvadagi  Sharq  tillari 
institutida ishlaydi, unga professor unvoni beriladi. 
Fitratning  ko’p  qirrali  ijodiy  merosida  dramaturgiya  alohida  o’ringa  ega.  Uning 
dramatik  shaklda  yozilgan  «Hindistonda  bir  farangi  ila  buxorolik  bir  mudarrisning 
munozarasi»  degan  birinchi  asari  1913-yili  M. Behbudiy  so’z  boshisi  bilan  alohida  kitob 
tarzida  chop  etiladi.  A. Fitrat  teatrga  tarbiya  minbari  sifatida  qarab  1914-yillari  Buxoroda 
havaskorlik  ishlarini  yo’lga  qo’yishda  qatnashadi,  o’zi  hatto  rollar  o’ynaydi.  M. Uyg’ur 
bilan  hamkorlikda  bo’lib,  1919—1924-yillari  «Temur  sag’anasi»,  «Chin  sevish»,  «Hind 
ixtilochilari»,  «Abo  Muslim»  pyesalarini  yaratdi.  1924-yili  uning  «Abulfayzxon», 
«Shaytonning tangriga isyoni», 1926-yili «Arslon» dramatik asarlari nashr etiladi.