Microsoft Word Tursunboyev S. O'zbek teatri tarixi. Majmua

KOMIL YASHIN 
(1909—1997)
 
 
Atoqli  dramaturg  va  jamoat  arbobi  Komil  Yashin  (Komil  Nu’monov)  Andijon 
shahrida Nu’mon Jumaboy o’g’li oilasida tug’ilgan. 6 yoshida eski maktabga beriladi, yangi 
maktabning  7-sinfini  tugatgach,  Sankt-Peterburgdagi  o’rmon  xo’jaligi  instituti  tayyorlov 
kursida va so’ng institutda ikki yil o’qiydi, shaharning rutubatli ob-havosi sog’ligiga to’g’ri 
kelmagach,  o’z  shahri  Andijonga  qaytadi,  maktabda  o’qituvchilik  bilan  shug’ullanadi. 
1928—1930-yillari  Andijon,  so’ng  O’zbek  davlat  musiqa  teatrlarida  adabiy  emakdosh, 
keyinroq  O’zbekiston  xalq  komissarlari  qoshidagi  san’at  ishlari  boshqarmasida  boshliq 
(1948—1949),  O’zbekiston  Yozuvchilar  uyushmasi  raisi  (1958—1980)  kabi  vazifalarda 
xizmat qiladi. 
K. Yashin  adabiyotga  juda  erta  kirib  kelgan  edi.  Birinchi  havaskorlik  «Sarang» 
pyesasini  14—15  yoshida  yozgan.  So’ng  «Teng  —  tengi  bilan»,  «Lolaxon»  (1927)  bir 
pardali  asarlarini  yaratadi.  1929-yili  atoqli  rejissor  Muzaffar  Muhamedov  boshchiligida 
Andijonda  yirik  ijodiy  jamoa  uyushgan  bo’lib,  shu  yerda  yaratilgan  «Ikki  kommunist» 
pyesasidan so’ng o’z hayotini teatr bilan bog’lashga ahd qiladi. 
K. Yashin dramaturgiyada ikki yo’nalishda ijod qilgan: «Yondiramiz» (1931), «Nomus 
va  muhabbat» (1935),  «Hamza»  (1940,  A. Umariy bilan),  «O’lim bosqinchilarga» (1942), 
«Oftobxon» (1944), «General Sobir Rahimov» (1949), «Buxoro» (1974) kabi pyesalar sof 
drama  janrida  yozilgan  bo’lsa,  «O’rtoqlar»  (1930),  «Ichkarida»  —  «Gulsara»  (1933—
1935),  «Nurxon»  (1940),  «Ravshan  va  Zulxumor»  (1957)  singari  asarlar  musiqali  drama 
janriga  oiddir.  «Bo’ron»  (1939),  «Ulug’  Kanal»  (1941),  «Dilorom»  (1958),  «Hamza» 
(1961) operalari uchun librettolar, «Asal», «Hamza» filmlari uchun ssenariylar yaratadi. 
K. Yashin  yirik  teatr  nazariyachilaridan  biri  edi.  U  21  yoshida  «Meyerxold  va  uning 
nazariyalari»  (1930)  maqolasida  o’sha  davrda  keng  shuhrat  topgan  rejissor  V. Meyerxold 
ijodiy  uslubini  tahlil  etib,  ijodiy  erkinlik  muammosini  olg’a  surgan  edi.  «O’zbek  opera-
baletini  yaratish  yo’lida»  (1934),  «Dramaturgiyaning  yetakchiligi  va  aktyor  ustaligi» 
(1935),  «Muqanna»  dramasi  haqida»  (1943)  singari  o’nlab  maqolalari  o’zbek  teatrini 
o’rganishda muhim manba hisoblanadi. 
O’zbek  teatri  va  dramaturgiyasini  rivojlantirishdagi  xizmatlari  uchun  K. Yashin 
O’zbekistonda  xizmat  ko’rsatgan  san’at  arbobi,  O’zbekiston  xalq  yozuvchisi  unvonlariga 
sazovor bo’ldi, 1974-yili unga Mehnat Qahramoni unvoni berildi.